Read Kishambala 1. Wakolinto 16 Bible Online

1. Wakolinto 16 - Kishambala bible

1. Wakolinto 16

¹Kwa mbuli ya shanguzo, waṅazingwa wajoshanguzizwa, hata inywi mγoshole sa viyaho, nilaγilizevyo mabumbangwa uko Galatiya!

²Kila juma mushi wa bosi kila muntu kwenyu aike kwakwe, sa ṅwenye avyokunda! Ne ndivyo aγenyeze, kangwe visheshanguziγwe aho, nihozaizila.

³Miya nikizabula, waja, ndiwo mgimbike, nitawatuma na baluwa, waiγale viya vya mbazi zenyu Yelusalemu.

⁴Ati vyaagiza, imi ṅwenye nikihita, watahita haṅwe na imi.

⁵Nezeniize kwenyu nikibinda kudumula shi ya Makedoniya;

⁶hambu uko Makedoniya nitazinka du, ati vyakunda, nitaikala kwenyu, hangi nitabinda nyota γuko, kangwe inywi munielekeze na uko, ndiko nihite.

⁷Hambu sikunda kumiona ivi lushe na kuzinka du, hambu naalila kunaikala kwenyu mishi kuṅwe, ati Zumbe anikundiza.

⁸Kunu Efeso neniikale, mpaka Penteloote ibule.

⁹Hambu kunu nizazuγwilwa luvi lukulu, ndimangwa yaγenda, kangi wabishi ni wangi.

¹⁰Ati Timoteyo aiza, mwolele, aikale kwenyu kishiwoγa! Hambu aγoshola ndimangwa ya Zumbe sa imi.

¹¹Kusheoneke mwemubela! Miya mwelekezei na kuivana, aize na kunu kwangu! Hambu namwafiza haṅwe na waja wanduγu watuhu.

¹²Yuja mnduγu mweitangwa Apolo nizamhimila kangi, shite na kwenyu haṅwe na waja wanduγu, miya kuhita ivi lushe nkakundile hata, atazaiza akikombaγanya.

¹³Gonai mesho, mγoloke kwa nguvu ya mitozesheze yenyu, mγaluke waγoshi we ntoγo!

¹⁴Mbuli zenyu zoshe zibontokele mwe kukundishana!

¹⁵Wanduγu, mbuli myokunda, shinu: Mwataila chengo cha Sitefana, kuti ni mulimbulo wa shi ya Akeya, kuti wazaγuwa wenye iyo ndima ya kutumikila waṅazi.

¹⁶We ivyoho, hata kila mtuhu mweambiza kuγoshola ndimangwa na kukihima hata inywi muwaitike!

¹⁷Natamilwa, kuti Sitefana na Fotunato na Akayiko wazaiza na kwangu, wakiniγoshwela viya, iuywi wenye mushidshilevyo.

¹⁸Wazashangalaza moyo wangu na yenyu; lushe we ivyoho muwataile! Matulo.

¹⁹Mabumbangwa ya Asiya yamiluγusha; Akila na Pulisika haṅwe na bumbangwa je mwe nyumba yawe waisiiza kumiluγusha, kuti mu wa Zumbe.

²⁰Wanduγu woshe wamiluγusha. Luγushanai mkifyosana milomo, sa waṅazi wavyoγoshola!

²¹Iji tulo imi Paulo nizajigonda na mkono wangu.

²²Muntu akishemkunda Zumbe Yesu Kilisito akatalanwa!

²³Zumbe aiza! Mbazi ya Zumbe Yesu imiikaile nyoshe!

²⁴Namikundisha inywi nyoshe mwena Zumbe Kilisito Yesu. Amini.