Read Kishambala 1. Wakolinto 2 Bible Online

1. Wakolinto 2 - Kishambala bible

1. Wakolinto 2

¹Wanduγu, nami nikiiza na kwenyu nizaiza kwamibilikila uwona wa Mulungu, siizile na mhembo wa milongele na wa mitailile.

²Hambu sitongonyeze kwenyu utalizi utuhu kushima uja wa Yesu Kilisito, kuti azakoṅwa.

³Nami nizaikala kwenyu na unyonge na woγa na kuwewa kabisa.

⁴Hata milongele yangu na mibilikile yangu ne ishivota na viyuγo, nivyolonga, miya izalaviliza nguvu ya mpehongwa,

⁵kangwe kutozesha kwenyu kusheanduke mwe viyuγo vya kimuntu, miya kuanduke mwe nguvu ya Mulungu.

⁶Viyuγo tivilonga kwa waja wabontolewo, miya soviyuγovya inu shi, soviyuγo vyawazumbe wa kiinushi webanika,

⁷miya tilonga viyuγo vya Mulungu vishilawilevyo, vifishiγwevyo, Mulungu ateγilevyo aho kale ṅwenye, vitinke utana ishwi.

⁸Kwa wazumbe wa kiinushi nkakuna mwevitaila; hambu ati wazavitaila, anga nkawamkomile Zumbe ṅwenye utana.

⁹Miya ni sa viyaho vigondiγwevyo: Zisho jashaonavyo, shikilo jashaivavyo, moyo wa muntu washadahavyo kuvifanyanya, ne Mulungu aliγanyizavyo waja wemkundisha.

¹⁰Hambu ishwi Mulungu azavitifumbwila na kutinka mpeho yakwe; hambu mpehongwa yabunkula vyoshe, hata vilindi vya Mulungu.

¹¹Hambu kuna muntu mwetaila vya muntu kushima mpeho ya yuja muntu, ayona nayo ṅwenye? Vivyoho hata vya Mulungu nkakuna mwevitaila kushima mpeho ya Mulungu.

¹²Miya ishwi nkatiinkiγwe mpeho ya kiinushi, tiinkiγwe mpeho yeanduka kwa Mulungu, kangwe titaileviya, tivyofilwa mbazi navyo ni Mulungu.

¹³Ivi ne tivyolonga, miya milongele nkatiifuziγwe ni wakiyuγo wa kimuntu, tiifuziγwe ni mpehongwa; viya vya mpehongwa tavitulila milongele ya kimpeho.

¹⁴Muntu mweitika moyo wakwe nkahokela viya vya mpeho ya Mulungu, aviitanga kuti: Ni ubabashi du, nkadaha kuvitaila, hambu ivi vikunda kudosiγwa kimpeho.

¹⁵Miya muntu mwena mpehongwa abunkula vyoshe, kangi ṅwenye nkana ayebunkulwa ndiye.

¹⁶Hambu ataileye mifanyanyize ya Zumbe, alahane naye, ni ndai? Kangi ishwi tina mifanyanyize ya Kilisito.