Read Kishambala 1. Wakolinto 6 Bible Online

1. Wakolinto 6 - Kishambala bible

1. Wakolinto 6

¹Ati kwenyu kuna muntu mwena masa na ṅwiyae, akundilai, yakilahiγwa kwa wamzimu, akishekunda kwa waṅazi?

²Hambu nkamtaila kuti: Waṅazi nezewailahe inu shi? Ati inu shi yazalahwa ni nywiyo, lushe nkamubesha kulaha masa yebeγeleka ivyoho!

³Nkamtaila kuti: Nezetilahe walaungwa? Viya vya kiinushi tishevilahe?

⁴Miya inywi ati muna masa ya kiinushi, mwagimbika waja webelwa ni bumbangwa, wayalahe?

⁵Nivilonga, nimigele shoni. Hambu kwenyu nkakuna mkiyuγo hata muṅwe, ndiye alamule mnduγu na ṅwiyae?

⁶Shuti mnduγu na mnduγu walahane masa, kangi mwaiγalana kwa waja washiwotozesha?

⁷Kuja kulahana masa koshe wenye na wenye ni kubana kwenyu. Nini mkishekunda kujiγwa bule?

⁸Nini mkishekundu kutungulukwa? Miya inywi mwajilana, mwatungulukana, kangi mu wanduγu.

⁹Hambu nkamtaila kuti: Weshowa utanda nkezewapale uzumbe wa Mulungu? Musheazaγanyiγwe! Watesi, wevika mizimu, mabuγe, wachevu,

¹⁰wegona na waγoshi weyae wawe, wabavi, wakuγu, wanywezi, wekanka, wampoko nkezewapale uzumbe wa Mulungu.

¹¹Kangi inywi kuṅwe ne mulivyo. Miya mzahakwa, mzaṅazwa, mzainkwa utanda na zina ja Zumbe Yesu Kilisito na kuinkwa mpeho ya Mulungu ywetu. Mshetongeie kilanga kuti mu madango ya Kilisito.

¹²Vyoshe niivishungulwe, miya nkaviziha vyoshe; vyoshe niivishungulwe, miya nkakuna ndivyo nikundilwe ni muntu.

¹³Nkande ni za ifu; kangi ifu ni ja nkande, Mulungu ne ndiye abane vyoshe vili; miya ṅwili so wa kilanga, ni wa Zumbe, kangi Zumbe ni ṅwenye ṅwili.

¹⁴Mulungu azamfufula Zumbe, vivyoho atazatifufula ishwi kwa nguvu yakwe.

¹⁵Nkamtaila kuti: Mili yenyu ni madango ya Kilisito? Lushe niγuwe madango ya Kilisilo, niyaγalushe ya kilanga? Sivyo.

¹⁶Hambu nkamtaila kuti: Yuja mweanga na mvyele mhuza atenda ṅwili muṅwe naye? Hambu vyalongwa kuti: Awa waili wataγaluka ṅwili muṅwe.

¹⁷Miya mweandakana na Zumbe atenda mpeho ṅwenga naye.

¹⁸Nyilikai kilanga! Hambu uhuza woshe, ndiwo muntu abane, so kubana ṅwili wakwe, miya mwetenda kilanga abana ṅwili wakwe ṅwenye.

¹⁹Hambu nkamtaila kuti: Mili yenyu ni vikilo ja mpeho ṅazi yemiikaila, mzaiinkwa ni Mulungu, inywi nkamu wenye.

²⁰Mzaγulwa na kuwo, kwa ivyoho mgimbikei Mulungu na mili yenyu na mpeho zenyu! Hambu ni vya Mulungu.