Read Kishambala 2. Wakolinto 1 Bible Online

2. Wakolinto 1 - Kishambala bible

2. Wakolinto 1

¹Imi Paulo nigimbikweye ntuṅwa ya Kilisito Yesu kwa viya, Mulungu akundilevyo, na mnduγu Timoteyo, tamigondela baluwa inywi wa humbangwa ja Mulungu je uko Kolinto haṅwe na waṅazi woshe we mwe shi ngima ya Akeya.

²Mbazi imiikaile na mpeho yeanduka kwa Mulungu Tate yweshu na kwa Zumbe Yesu Kilisito!

³Atogolwe Mulungu, ishe ja Zumbe ywetu Yesu Kilisito! Ni Tate mwe utungu, ni Mulungu mwena mhembulizo woshe,

⁴mwetihembuliza mwe ukiwa wetu woshe, kangwe waja weikala na ukiwakiwa tidahe kuwahembuliza na uja mhembulizo, tihembuliziγwewo nawo ni Mulungu.

⁵Tivyoisa kulumiziγwa, sa Kilisito alumiziγwevyo, vivyoho taisiiza kuhembuliziγwa ni Kilisito.

⁶Lushe tikiona ukiwa, ni kwa mbuli ya mhembulizo na ya uhonya wenyu; kangi tikihembuliziγwa, ni kwa mbuli ya mhembulizo wenyu weoneka nguvu yakwe aho, mkizizimiza hata inywi iyo milumilwe, tiyolumilwa ishwi wenye.

⁷Kwa inu mbuli kialilo chetu, tichomialila nacho, chatoγa, hambu tataila: Sa muvyopangilwa kulumilwa, vivyoho nezemupangilwe hata kuhembuliziγwa.

⁸Hambu nkatikunda ishwi, wanduγu, mkishetaila ija nkondo, tieneyo uko Asiya, tizaisiiza kuhimbilwa ndiyo kuzinka nguvu yetu, nkatiene luhonele;

⁹wenye kwa mbuli ya ishwi tizaγamba: Netife, kangwe tishealile viya vyetu, miya timwalile Mulungu mwefufula wafilewo.

¹⁰Uyu azatihonya kufa kweinga aha, nkealeke kutihonya vivyoho; uyu tamwalila lushe kuti: Nezeakatihonye vivyoho.

¹¹Kangi hata inywi mwatiambiza na kutihembelezeza; lushe wetiolela wakiγenela ivyoho, mbazi tifilwezo ishwi zitalavilizwa ntogolo ni wangi vivyoho kwa mbuli ya ishwi.

¹²Tivyokitogola wenye shivi: Kuti myoyo yetu yatilongela uwona, kuti tizaanga mwe inu shi kiṅazi na kikweli, so kwa viyuγo vya kiinushi, miya ni kwa mbazi ya Mulungu, hata kwenyu tizaisa kukihima navyo.

¹³Nkatimigondela vituhutuhu, ni viya muvyofyoma, ni viya muvyotaila, naalila,

¹⁴kuti nezemuvitailishe bontokelo, sa muvyotitaila kuṅwe, kuti tamitogwelwa, sa inywi muvyotitogwelwa mushi wa Zumbe ywetu Yesu.

¹⁵Kwa kuti naafiza ivyoho, nizakunda bosi kunaiza na kwenyu, kangwe mwone nyemi kaili:

¹⁶Aho nikizinka kwenyu, nikihita Makedoniya, vituhu nikiuya Makedoniya nikigwila kwenyu, kangwe munielekeze na Yudeya.

¹⁷Nikivikunda ivyoho nitetenda upalanganyi? Ao du vyangu nivyokunda nivikunda kimuntumuntu?

¹⁸Lushe nikilonga: Ndivyo ne sivyo? Mulungu mwe kweli ataila kuti: Mbuli yetu timiγambileyo, nkaina haili: Kuitikila na kulemela.

¹⁹Hambu ṅwanangwa ywa Mulungu, Kilisito Yesu, ndiye akibilikilwa kwenyu ni shwiyo, imi na Silwano na Timoteyo, uyu Yesu nkatendile ndivyo na sivyo, miya mwe uyu mzaoneka ndivyo.

²⁰Hambu misuhi yoshe, Mulungu alavizeyo kale, izaγaluka ndivyo, izahontolwa ndiye, kangwe Mulungu aiogolwe ni shwiyo.

²¹Miya ni Mulungu ṅwenye mwetigela nguvu haṅwe na inywi, tiγaluke wa Kilisito, mwetigimbika,

²²mwetinka Iwitangilo na kutiingiziza mwe myoyo yetu mpeho ṅazi, itiγalukile guha.

²³Namlanga Mulungu, aniγalukile mwona kuti: Vilekilevyo, nikishenaiza Kolinto ni mbazi na inywi,

²⁴so kwa kuti tamifanyanyiza mitozesheze, miya takunda kuambizanya na mywi, tione nyemi kiṅwe; hambu inywi mwaγoloka na kutozesha.