Read Kishambala 2. Wakolinto 11 Bible Online

2. Wakolinto 11 - Kishambala bible

2. Wakolinto 11

¹Mkatazizimiza hadodo ani, nikimilonga Vya ubabashi! Nataila, kuti mwanizizimiziza.

²Hambu nivyokihima kwa mbuli ya inywi, ni vya Kimulungu; hambu nizamiinkila kwa mγoshi muṅwe, ni Kilisito, nimiiγale na kwakwe, viya ni mndele ashitendileye uhuza.

³Miya sa nyoka imhosizevyo Ewa na ugila wakwe, naogoha vivyoho, hata ntongonyezi zenyu zishezatabaniγwa, mshedahe kumwalila Kilisito.

⁴Hambu kukioneka mwebilikila Yesu mtuhu, tishimubilikileye, ao mkiγuwa moyo mtuhu, mshiγwilewo, ao ulau utuhu, mshihokelewo, mwazizimiza vitana.

⁵Miya naγamba: Imi nami si mdodo kuzinka waja weisa kugimbikwa kintuṅwa.

⁶Ati imi ni mdashi ywa kulonga, si mdashi ywa kutaila, na mbuli zoshe mwanitaila ivyoho mishi yoshe.

⁷Hambu nizatenda uhuza nikikipunguza ṅwenye, kangwe inywi mγaluke wakulu? Hambu nimibilikile ulau wa Mulungu bule?

⁸Mabumba matuhu nizayahoka vyawe nikiγuwa kitumulo, nidahe kumitumikila.

⁹Hata nii kwenyu, ati nizakosa, sina nimpishizeye. Wanduγu weanduka Makedoniya waakausha ukosi wangu; mwe mbuli nizakiolelesha, niikale kwenyu kishi lupisho lwoshe, kangi nezeniikale vivyoho.

¹⁰Ati kweli ya Kilisito nina nayo, inu ntogolo yangu nkeibanike mwe shi za Akeya. Nini ivyoho? Kuti

¹¹simikunda? Mulungu avitaila!

¹²Nivyoγoshola, nezeniviγoshole vivyoho, kangwe niwachakwile waja mizungu welonda mizungu, wadahekitogola, kuti wazaoniγwa, wa ivyoho, sa ishwi tilivyo.

¹³Hambu we ivyoho ni ntuṅwa za ulongo, ni wandima wena lwufyo, wakionyaonya, viya ni ntuṅwa za Kilisito.

¹⁴Kangi icho so kimaka, hambu Satani ṅwenye akionyaonya, viya ni mlau ywa langaila.

¹⁵Lushe ni mbuli ani nkulu, wemtumikila wohe wakikionyaonya viya watatumikila mbuli za utanda. Bindihzo jawe jitazaivana na miγoshwele yawe.

¹⁶Nalonga vituhu, kangwe muntu ashezaninka ubabashi, ati nkamkunda vivyoho, nihokelai, viya ni mubabashi, nami nikitogole hadodo!

¹⁷Nivyolonga lushe, sivilonga kwa mulomo wa Zumbe, miya viya ni vya ubabashi kwa viya, tibulizevyo kukitogola.

¹⁸Wangi wakikitogola kiinushi, nami nenikitogole.

¹⁹Kwa kuti muna viyuγo, mwatamilwa ni wadashi.

²⁰Mwazizimiza, muntu akimiγalusha wapuna, akimija, akiγuwa vyenyu, akihikuka, akimitowa mwe vyeni.

²¹Nalonga na shoni kuti: Ivyoho nkatividaha, ti wanyonge, miya viya, muntu avyokihikula navyo — nalonga na ubahashi — hata imi nakihikula navyo.

²²Ni Waebuleyo? Hata imi. Ni Waisilayeli? Hata imi. Ni mbeleko ya Abulahamu? Hata imi.

²³Wamtumikila Kilisito? Nalonga vishivyoteγana: Nawazinka! Nizapisha kuwazinka, nizatowiγwa kuwazinka, nizashungwa kuwazinka, nizaoaia kangi muno nkondo zekoma kuwazinka.

²⁴Nizatowiγwa ni Wayuda kashano ngoda milongo mine, ukiusha ṅwenga;

²⁵katatu nizatowiγwa vibonko, kaṅwe nizahomelwa mawe; katatu chombo changu chizabanika mwe bahali, nizaikala kilo na mushi uko ndai kwe bahali.

²⁶Nizatambisha, nizaona nkondo na mito, nkondo na wampoko, nkondo na mbalingwa, nkondo na wamzimu, nkondo na mizi, nkondo ṅa nyika, nkondo na bahali, nkondo na wanduγu wa ulongo;

²⁷nizaona lulali na muku nikigonyiγwa mesho, nikiluṅwa ni sala na nkilu, nikikundilwa kufunga, nikishowa vya kiγubika na vya zwika.

²⁸Kushima ziya mbuli zoshe ntuhu zeniizila mushi kwa mushi, kuti naona simgu kwa mbuli ya mabumba yoshe.

²⁹Hana mnyonge, imi nami si mnyonge? Hana mweihiziγwa, imi nkavinilumiza?

³⁰Ati naγangwa: Mpaka ukitogole, nenikitogwele unyonge wangu!

³¹Mulungu, ishe ja Zumbe Yesu, mweagiziγwa ni ntogolo kale na kale ataila kuti: Silonga ulongo.

³²Kuja Damasiko mfuṅwa ywa zumbe Aleta azaγoja muzi wa Damasiko, kangwe anigwile;

³³miya nizasheleziγwa na ngahu mwe dilisha he boma luwai, ne ninyilikevyo mikono yakwe.