Read Kishambala 2. Wakolinto 12 Bible Online

2. Wakolinto 12 - Kishambala bible

2. Wakolinto 12

¹Kukitogola kwakundwa, hata kukishetama; nitabulila lushe milawile na mifumbwile ya Zumbe.

²Nataila muntu mwena Kilisito, lushe kuzazinka mavuli kumi na mane, — ati ne ai mwe ṅwili wakwe, sitaila, ati aitanyiγwe na ṅwili wakwe, sitaila, Mulungu ataila — uyu muntu ne akiiγalwa na nguvu mpaka kwe lwingu lwa ntatu.

³Vituhu namtaila uyu muntu — ati ne ai mwe ṅwili wakwe, ati aitanyiγwe na ṅwili wakwe, sitaila —,

⁴kuti azaiγalwa na nguvu na mwe Paladiso, ne aivileho mbuli zishidahikanazo kulongwa, kangi muntu nkavimwagiza kuzilonga.

⁵Vya uyu muntu nenivitogole, miya vyangu senivitogole, kushima vya unyonge wangu.

⁶Ati nakunda kukitogola, sezeniγaluke mubabashi, hambu inga nilonge vya kweli; miya naleka, kangwe muntu ashezanifanyanyiza kuzinka haja, ahokaniona ao du ahokaniiva.

⁷Kangwe nishehikuke na viya, nivyoisa kufilwa mbazi na kuvifumbwilwa, nizainkwa mtunga wekatunga ṅwili wangu, ni mlau ywa Satani mwekashungulwa, anitowe nkonde, nishezahikuka.

⁸Kwa inu mbuli nizamkemela Zumbe katatu, uyu aniukile,

⁹miya azanilandula: Tamilwa du ni mbazi yangu! Yabesha; hambu mwe unyonge ne nguvu yangu imotendesha. Ne vyeleka, nikikundisha kukitogola na unyonge wangu, kangwe nguvu ya Kilisito iniikaile.

¹⁰Kwa inu mbuli naṅalwa ni moyo nikihuma, nikieziγwa, nikiifiγwa, nikiγulushiγwa, nikionyiγwa lulali kwa mbuli ya Kilisito; hambu aho ndiho niγaluke mnyonge, ne ndiho nitende nguvu.

¹¹Na kuja kukitogola nizaγaluka mdashi, miya inywi mzanikundila, anga nizatogolwa ni nywiyo, hambu siashiγwa nyuma ni waja weisa kugimbikwa kintuṅwa, kangi ṅwenye ni luzala du.

¹²Hambu viya vyemanyisha ntuṅwa vizaγosholwa kwenyu, ati ni uzizimizi ungi, ati ni ntangilo na vimaka na vya nguvu.

¹³Hambu ni vihi muvyoashiγwa nyuma ni mabumba matuhu, ati so inu mbuli kuti: Simijile? Niushilizai unu uhuza!

¹⁴Olelai, lushe nakiteγa ka ntatu kuiza na kwenyu, kangi sezenije vyenyu; hambu silonda viya vyenyu, miya nimilonda inywi. Hambu nkaviagiza, wana wakiumbikila wavyazi kitende, shuti wavyazi waumbikile wana!

¹⁵Imi nakundisha kulavya vyangu, kangi nezenilaviγwe ṅwenye, kwa mbuli ya inywi; nikiisa kumikundisha, ne nihoshekundwa vyedi?

¹⁶Miya ni vivyo, nishimionyizevyo lulali; miya kwa kuti naγenyeza mizungu nizamigwila na minyanyi.

¹⁷He waja nitumilewo na kwenyu, nizamitunguluka nawo?

¹⁸Nizamhembeleza Tito, kangi nizatuma naye yuja mnduγu. Hambu Tito azamitunguluka? Mpeho, tiangileyo nayo, so iyo ṅwenga? Nyayo, titongelezo, so zizo?

¹⁹Mwaγamba vituhu kuti: Takikanila kwenyu? Tamlanga Mulungu na Kilisito; kangi wanduγu, tiwokundisha, ivi vyoshe tivilonga, kangwe timizifye.

²⁰Hambu naogoha kufi: Nikizaiza nenimione, sa nishivyokunda kumiona, nami nenioniγwe ni nywiyo, sa mushivyokunda kuniona, kwa mbuli ya nkumbizi na wizu na maya na ulongo na mambeza na leba na mahiku na uhuza ungi.

²¹Ne nihoogoha kuti: Nikizaiza vituhu, Mulungu ywangu atanipunguza, nitaona ukiwa kwa mbuli ya wangi wabanilewo, niishiho, kangi nkawavotekele upapalishi na umbeya na uhambanyi, waγosholewo.