Read Kishambala 2. Wakolinto 13 Bible Online

2. Wakolinto 13 - Kishambala bible

2. Wakolinto 13

¹Nikizaiza kwenyu ka ntatu, masa yoshe yatabontolwa ni vyanwa vya waona waili ao watatu.

²Nizavilonga kale nikiiza ka mbili kwenyu, kangi navilonga ivi lushe niishi kwenyu kuti: Nikizaiza vituhu sezeniive mbazi na waja wabanilewo mishi izinkileyo na waja woshe watuhu, kwa kuti mwakunda kuγeza,

³ati ni kweli kuti: Kilisito alonga na kanwa changu; uyu Kilisito nkamilonga na unyonge, miya atenda nguvu kwenyu.

⁴Kweli azakontelwa mwe muti, viya ni mnyonge, miya a moyo kwa nguvu ya Mulungu. Hata ishwi ti wanyonge naye, miya nemwone, kuti ti moyo haṅwe naye kwa nguvu ya Mulungu.

⁵Kiγezei wenye, ati mwaanga na kutozesha! Kibunkulei! Hambu nkamkitaila, ati Yesu Kilisito muna naye? Ati sivyo, mzabinda kubunkuka,

⁶miya naalila, kuti nezemtaile, kuti ishwi nkati walongo.

⁷Tamhembeleza Mulungu, msheγoshole vyeiha, so kwa mbuli ya ishwi, kangwe timanyike, kuti ti wakweli, miya kwa mbuli ya inywi, kangwe mγoshole vyetama, hata ishwi tikifanana, viya ti walongo.

⁸Hambu ishwi nkatidaha kufingiza vya kweli, mpaka tikanile vya kweli!

⁹Tatamilwa, ishwi tiγaluke wanyonge, inywi mγaluke wanguvu; inu mbuli ne tiyohembeleza, inywi mtame vyedi.

¹⁰Ne vyeleka, nikigoinda izi mbuli, nii hale, kangwe nikizamilawila nishelahe masa yenyu na nguvu kwa uja ufuṅwa, Zumbe aninkilewo, nimizifye, nishemichakule.

¹¹Lushe wanduγu, onal nyemi! Tamizanyai! Shundanai! Tendai moyo muṅwe! Ivanai! Mulungu aange na inywi mwe lukundisho na mpolele!

¹²Luγushanai mkifyosana milomo, sa waṅazi wavyoγoshola! Waṅazi woshe wamiluγusha.

¹³Mbazi ya Zumbe ywetu Yesu Kilisito, lukundisho lwa Mulungu, mwangilano na Mpeho mṅazi viikale na inywi nyoshe! Amini.