Read Kishambala 2. Wakolinto 5 Bible Online

2. Wakolinto 5 - Kishambala bible

2. Wakolinto 5

¹Hambu tataila, nyumba zetu za kunu shi, tizoikala, zikizachakulwa, tina nyumba zizengiγwezo ni Mulungu, zishizengiγwezo na mikono, zekalama mwe lwingu.

²Kwa inu mbuli tiyakahesa myoyo, tikitendwa ni kihelehele, tizwikwe jiya ikailo jetu jeanduka mwe lwingu kwa kuγamba:

³Tikijizwika nkatizaoniγwa kuti: Ti bule.

⁴Hambu tike mwe iji kumbi, tiyakahesa myoyo kwa mbuli ya kuzwamilwa; ne vyeleka, tikishekunda kuzulwa, miya tikikunda kuzwikwa, kangwe viya vyefa vibindiγwe ni nkalamo.

⁵Atiliγanyeye kwe inu mbuli ni Mulungu atinkileye guha, ni mpeho yakwe.

⁶Kwa ivyoho tatoγwa ni myoyo, kangi tataila: Aho tihoikala mwe mili tamwikaila Zumbe hale;

⁷hambu taanga na kutozesha, nkatianga na kuona.

⁸Miya tatoγwa ni myoyo, kangi taisa kutamilwa ni kuiikaziza mili hale, timwikaile Zumbe hehi.

⁹Ne vyeleka, tikikihima, atitamilwe, ati tamwikaila hale, ati tamwikaila hehi.

¹⁰Hambu ishwi toshe titazabunkuka he kiti cha Kilisito; kangwe timote kila muntu kwa viya aγosholavyo ake mwe ṅwili wakwe, ati ni vitana, ati ni vibada.

¹¹Kwa kuti taiva woγa na Zumbe, tahimila myoyo ya wantu, tiitailwe ni Mulungu; miya hata aho naalila kuti: Tiitailwe ni myoyo yenyu.

¹²Nkatikitogola vituhu kwenyu, miya taminka lutogolele kwa mbuli ya ishwi kwa waja wekitogola na viya vyeoniγwa, kushima vya moyo.

¹³Hambu ati talaluka, timlalukila Mulungu, ati tatenda viyuγo, ni kwa mbuli ya inywi;

¹⁴hambu lukundisho lwa Kilisito lwatihimila ishwi, tikifanyanya kuti: Ati muṅwe azafa kwa mbuli ya woshe, lushe awa woshe wazabinda kufa;

¹⁵kangi azafa kwa mbuli ya woshe, kangwe awa we moyo washekiikaile wenye, miya wamwikaile yuja afileye, kangi afufukeye kwa mbuli yawe.

¹⁶Ne vyeleka, ivi lushe nkatina tiyetaila kiṅwili; ati tizamtaila Kilisito kiṅwili, miya lushe nkatizamtaila.

¹⁷Vyaleka, ati muntu ana Kilisito, ni kiumbo kihya; vya kale vizazinka, ukiviolela: Vizaγaluka vihya.

¹⁸Miya ivi vyoshe vianduka kwa Mulungu, kwa kuti azatitemeka, tiivane naye, aho akimγalusha Kilisito temo, kangi akitinka ufuṅwa wa kubilikila uja mtemeko kuti:

¹⁹Mulungu alivyo mwe Kilisito azatemeka wa inu shi, waivane naye, nkawatazile mabano yawe, kangi azatiikila icho kilaγa cha uja mtemeko.

²⁰Lushe tamγalukila Kilisito walau, viya Mulungu ṅwenye atemiitanga na vyanwa vyetu; kwa mbuli ya Kilisito tamihembeleza: Mtemekelwei Mulungu!

²¹Ashitailaye uhuza azamγalusha mhuza kwa mbuli ya ishwi, kangwe ishwi tiγalushiγwe ndiye watanda wa Kimulungu.