Read Kishambala 2. Wakolinto 7 Bible Online

2. Wakolinto 7 - Kishambala bible

2. Wakolinto 7

¹Weyangu niwokundisha! Kwa kuti tiiikilwe misuhi yeinga aha, netikihoze kwa mbuli zoshe zigezilezo mili yetu na mpeho zetu kisitama, kangwe tibontoleze kukiṅaza kwa viya tivyomwogoha Mulungu!

²Tihakanyei mwe myoyo yenyu! Nkahana timwifizeye, nkahana timhosizeye, nkahana timfutileye.

³Sivilonga, kangwe nimilahe, hambu ivi lushe nizalonga kuti: Mu mwe myoyo yetu, tifile haṅwe, kangi tikalamile haṅwe.

⁴Naisiiza kumialila, kangi namitogola kwa mbuli nyingi; moyo wangu uishangalale vitana, nyemi yangu yaisiiza kuγenela, hata ukiwa ukioneka ungi kwetu.

⁵Hambu aho tikibula Makedoniya, mili yetu nkaidahile kuhema hata kwa mbuli ya ukiwa, tienewo koshe koshe, se ni nkondo, uko ndai ni woγa.

⁶Miya Mulungu mweshangalaza wadodo azatishangalaza na kuiza kwa Tito,

⁷kangi siko kuiza kwakwe du kutishangalazeko, miya hata uja mshangalazo, ndiwo ṅwenye akishangalaziγwa nawo kwenyu, hambu azatishimwela, nkwina zenyu zivyokula, muvyolila, muvyokihima kwa mbuli ya imi; ivi vizanigwishiliza nyemi yezinka nyemi ntuhu.

⁸Kuti nizamionya ukiwa na ija baluwa, siihilwa ndiko, hata nikiγamba: Naihilwa ndiko, kwa kuti naona kuti:

⁹Ija baluwa izamionya sungu hadodo, hata vivyo ivi lushe natamilwa, so kwa kuγamba: Mzaonyiγwa ukiwa, miya kwa kuγamba: Uwo ukiwa, mwenewo, uzaleka, mkivoteka; hambu mzaona ukiwa wa Kimulungu, kangwe mshehosiγwe ni mbuli yeanduka kwetu.

¹⁰Hambu ukiwa wa Kimulungu wahonya ukileka, muntu avoteke na kushezaihilwa, miya ukiwa wa kiinushi wakoma. Hambu lushe mkiolela iyo mbuli,

¹¹kuti mzaonyiγwa ukiwa wa Kimulungu, izaleka, mkikihima vyekuinga haja, mkikikanila haṅwe na kuihilwa na kuogoha, kangi mkitendwa ni kihelehele cha kufikalaha ija mbuli; mzakibunkula na ivi vyoshe kuti: Ayo masa nkayamiteγane.

¹²Aho nikimigondela, sigondile kwa mbuli ya yuja abanileye ao du kwa mbuli ya yuja abanilweye, miya kangwe vibunkuke, muvyokihima mbuli ya ishwi; ivi vyaleka, mtogolwe kwa Mulungu. Kwa ivyoho tizashangalaziγwa.

¹³Lushe kwa kuti myoyo yetu iishangalale, tizaisa kutamilwa ni ija nyemi, Tito aeneyo, kuti moyo wakwe uimṅazile kwa inywi nyoshe.

¹⁴Ati nizanamitogwela kwakwe, siinkwa lushe ulongo navyo, miya sa viya vyoshe timiγambilevyo vilivyo vya kweli, vivyoho hata viya, ndivyo timitogwele kwa Tito, vizamanyika kuti: Ni vya kweli.

¹⁵Kangi moyo wakwe waisa kuolela na kwenyu, akifukila, inywi nyoshe muvyomwitika, muvyomhokela na woγa ungi.

¹⁶Natamilwa, kuti nadaha kumialila mwe mbuli zoshe.