Read Kishambala 2. Wakolinto 9 Bible Online

2. Wakolinto 9 - Kishambala bible

2. Wakolinto 9

¹Kwa mbuli ya inu ndima ya mbazi, waṅazingwa wayoγoshwelwa, nkaviniagiza kushindamigondela;

²hambu nataila kuti: Mwakunda, kangi ne nikimitogola kwa Wamakedoniya kuγamba: Waakeya hata vuli ja zuzi waikundile; kunu kukihiina kwenyu kuzahimila wangi watuhu.

³Miya nizatuma awa wanduγu, kangwe viya nivyomitogwela vishebanike mwe inu mbuli, miya kangwe mwoniγwe kuti: Mwikiteγile, sa vyaho nilongilevyo.

⁴Ati Wamakedoniya waiza haṅwe na imi, ati wamiona, mwishikiteγile, titaγaluka walongo ishwi, nisheγambe inywi, na viya tilongilevyo.

⁵Kwa inu mbuli nizaγamba, shuti nihimile awa wanduγu walongolewo na kwenyu, wameliγanya viya vya ntogolo yenyu, mwalongavyo kale, kangwe tivibwile, viilaviγwe, viya ni vya ntogolo kweli, so viya ni vya ubuγe.

⁶Miya tataila kuti: Mwehanda na ukuγu atazaonela viya vya ukuγu wakwe; mfya mwehanda na kulavya ntogolo atazaonela viya vya ntogolo zakwe.

⁷Kila muntu alavye, sa ṅwenye aikilevyo mwe moyo wakwe, asheinkile na kuihilwa ao kwa ntoγo! Hambu Mulungu amkunda mweinkila na nyemi.

⁸Mulungu adaha kumiγenyezeza mbazi, kangwe viya muvyoagiziγwa ndivyo mishi yoshe vimibesheze,

⁹kangi mvishiγazize ndima zoshe ntana, sa vigondiγwevyo: Azamyaγila mbeyu akipangila wakiwa, miya unu utanda wakwe wakalama kale na kale.

¹⁰Yuja mwemlaviliza mtakuhanda mbeyu na nkande za kuja, yohe neamilavilize, neamiγenyezeze mbeyu, neakuze viya vya utanda wenyu, kangwe na viya vyoshe mγaluke wazuli,

¹¹mtende kishe choshe chemlaviliza Mulungu ntogolo na kuinkila mwe mikono yetu.

¹²Hambu inu ndima ya mbazi yatumikilwa ivi lushe nkaifa kuusha ukosi wa waja waṅazingwa, miya yabontoka vitana, wangi wakimlaviliza Mulungu ntogolo.

¹³Inu ndima mkiiγoshola kweli kwa mbazi du mwamgimbika Mulungu nayo, hambu ivyoho mwitika viya, muvyolonga vya ulau wedi wa Kilisito, kuti mzaukunda, kangi ne muvyotenda kishe cha kupangila waja na woshe watuhu.

¹⁴Kangi waja wakimihembelezeza waingilwa ni nkwina na inywi, kwa kuti mbazi ya Mulungu yaisiiza kukula kwenyu.

¹⁵Mulungu atogolwe kwa viya, avyotifa mbazi navyo, vishivyodahikana kulongwa!