Read Kishambala Wagalatiya 1 Bible Online

Wagalatiya 1 - Kishambala bible

Wagalatiya 1

¹Imi Paulo ni ntuṅwa, kangi sitetuṅwa ni wantu ao kwa mulomo wa muntu, miya kwa mulomo wa Yesu Kilisito na wa ishe Mulungu amfufuleye kwa wafilewo.

²Imi na wanduγu woshe we haṅwe na imi tagondela mabumba yoshe ya Galatiya baluwa:

³Mbazi imiikaile na mpeho yeanduka kwa Mulungu, Tate yweshu, na kwa Zumbe ywetu Yesu Kilisito,

⁴ndiye akikiinkila ṅwenye kwa mbuli ya uhuza wetu, kangwe atilavye mwe inu shi mbadaya ivi lushe; ne Mulungu, Tateyweshu, akundilevyo.

⁵Uyu agimbikwe kale na kale! Amini.

⁶Namaka kuti: Mwafikaushiγwa ha yuja amiitangeye kwa mbazi ya Kilisito, kuti: Mwatongela ulau wedi utuhu;

⁷kangi nkakuna utuhu, kuna du wemiazaγanya, wekunda kubana ulau wa Kilisito.

⁸Miya hata ishwi wenye ao mlau mwelawa mwe lwingu, ati amibilikila ulau wedi utuhu kushima uja, timibilikilewo, akatabanika!

⁹Sa tilongilevyo kale, ne tivyolonga ivi lushe vituhu: Ati mimtu amibilikila ulau kushima uja, muhokelewo, akatabanika!

¹⁰Lushe nikitamiziza wantu, hambu Mulungu? Hambu nilonda, nitamile wantu? Ati niketamila wantu, anga si mtuṅwa ywa Kilisito.

¹¹Hambu namiukwila, wanduγu, kuti uja ulau wedi webilikilwa ni miyo so wa kimuntu,

¹²kangi siuhokele kwa muntu, siuhinyiγwe ni muntu, miya niufumbwilwe ni Yesu Kilisito.

¹³Hambu mzaiva, niangilevyo kale nike mwe Uyuda, kuti nizaisiiza kuγulusha bumbangwa ja Mulungu na kujichakula;

¹⁴kangi uko kwe Uyuda nizazinka wangi walika weyangu wa mbali yangu nikiisiiza kuhimila misimo ya wababa zangu.

¹⁵Miya Mulungu ainiahule, nike mwe ifu ja mlala, ainiitange kwa mbazi yakwe;

¹⁶aho akundileho kumnifumbwila ṅwanae, kangwe nimubilikile kwa wamzimu, viya du lushe nizadumula, sishindilefanyanya na ṅwili wangu we nyama na mpome;

¹⁷hata Yelusalemu sikwezile kwa waja wagimbikwewo ntuṅwa, imi nishizati, miya nizahita Alabiya, nikibinda nizauya na Damasiko.

¹⁸Mavuli matatu yakizinka, nizakwela Yelusalemu, nitailane na Petelo, nizaikala naye mishi kumi na mishano.

¹⁹Ziya ntuṅwa ntuhu sina nieneye kushima Yakobo, nduγuye ja Zumbe.

²⁰Nivyomigondela, Mulimgu ni mwona kuti: Silonga ulongo.

²¹Vikibinda nizaiza mwe shi za Siliya na za Kilikiya.

²²Miya mabumba ya Kilisito ya Yudeya ne yashinitaila cheni.

²³Waivile du kuti: Yuja ndiye akitiγulusha abilikila lushe uja mtozesho, akundilewo kuchakula.

²⁴Kwa ivyoho wazamtogola Mulungu kwa mbuli ya imi.