Read Kishambala Wagalatiya 2 Bible Online

Wagalatiya 2 - Kishambala bible

Wagalatiya 2

¹Kukizinka mavuli kumi na mane, nizakwela vituhu Yelusalemu haṅwe na Balinaba, hata Tito ne niina naye;

²miya nikwezile, kwa kuti nizalaγiliziγwa ni Zumbe; nizawaonyesha ulau wedi, niwobilikila kwa wamzimu; nizaisa kuwaonyesha waja weitangwa, kuti ni wakulu, waone, ati viya nivyoanga na viya naangavyo ni Vya bule du.

³Yuja Tito, niyena naye aha, ni Mgiliki, kangi nkakundilwe kushengwa;

⁴miya ne haina wanduγu wa ulongo wakiingizewo kinjamanjama, awa wazakigela na mumu, watinyatile kwa viya, tivyoanga kishiṅwiko kwa mbuli ya Kilisito Yesu, kuunga nezewatikundile miko.

⁵Awa nkatiwavotekele na kuwaitika hata hadodo, kangwe uwo ulau wedi utailikane kwenyu kale na kale, kuti ni wa kweli.

⁶Miya waja weitangwa, kuti ni wakulu — aho kale walivyo, sina mbuli navyo, hambu Mulungu nkaolela cheni cha muntu — naγamba: Waja weitangwa, kuti ni wakulu, nkawaniγenyezeze mbuli,

⁷wazaona kweli, kuti nizagimbikwa, nibilikile waja washishengiγwewo, sa Petelo avyogimbikilwa washengiγwewo.

⁸Hambu yuja amgezileye Petelo nguvu, aγaluke ntuṅwa ya waja washengiγwewo, ne anigezileye imi nami nguvu kwa wamzimu.

⁹Lushe wakitaila iyo mbazi nifilweyo imi, Yakobo na Kefa na Yohana weitangwa, kuti ni mikolangwa, wazaninka imi na Balinaba mikono, tizaivana kuti: Ishwi tibilikile wamzimu,

¹⁰waja wabilikile washengiγwewo, komo tifukile wakiwawawe; inu mbuli nizakihima kuibontola.

¹¹Kefa akiiza Antiyokiya, nizamwikila nkani, ṅwenye ai haho, kwa kuti aiziγiγwe mbuli.

¹²Hambu ne haina watumiγwewo ni Yakobo; awa washizati walawile, ne akija haṅwe na wamzimu; miya wakilawila, azabahuka, azakiahula ṅwenye, hambu azaogoha waja washengiγwewo.

¹³Hata Wayuda watuhu we haho wazahenya vivyoho haṅwe naye, hata Balinaba azahosiγwa ni unu ulongo wawe;

¹⁴miya nikiona kuti: Myangile yawe nkaiivana na ukweli wa ulaungwa, nizamlonga Petelo, woshe waiivile: Iwe u Muyuda, kangi waanga kimzimu, nkuanga Kiyuda, lushe wamzimu uwakundila zeze kuanga Kiyuda?

¹⁵Ishwi tivyelwe Wayuda, nkati wahuza weanduka kwa wamzimu, miya tataila kuti,

¹⁶Muntu nkaγaluka mtanda, kuti aγoshola mulomongwa, miya aγaluka mtanda aho du akimtozesha Kilisito Yesu; kwa inu mbuli hata ishwi tamtozesha Kilisito Yesu, kangwe tiγaluke watanda, kuti tamtozesha, so kwa kuti taγoshola mulomongwa, hambu nkahana muntu mweγaluka mtanda na kuγoshola muiomongwa.

¹⁷Ishwi telonda, tiγaluke watanda kwa viya, tivyoanga na Kilisito, lushe ati wenye tiyaoniγwa kuti: Ti wahuza, anga Kilisito yohena siye mwetumikila uhuza? Miya sivyo!

¹⁸Hambu ṅwenye nikizenga vituhu viya, nichakulevyo, lushe nazinkana na imi ṅwenye.

¹⁹Miya mulomongwa ne ulekilewo, nikiufila uwo mulomongwa, kangwe nimwikaile Mulungu; nizakontelwa haṅwe na Kilisito mwe muti,

²⁰kangi ni moyo, miya si miyo ṅwenye, Kilisito ne mwe moyo mwe ṅwili wangu; ivyo nivyoaugila lushe kunu shi, niviangila na kumtozesha ṅwanangwa ywa Mulungu, ndiye akinikundisha, ndiye akikiinkila ṅwenye kwa mbuli ya bui.

²¹Siteusha mbazi ya Mulungu; hambu ati utanda uanduka kwe mulomongwa, anga Kilisito afile bule.