Read Kishambala Wagalatiya 4 Bible Online

Wagalatiya 4 - Kishambala bible

Wagalatiya 4

¹Naγamba: Mupazi ake mnkebe, hata ni ṅwenye kitende choshe, miya nkamzinka mtuṅwa

²miya aitika walezi na waγolokezi mpaka kwe ija mishi, ishe aikileyo.

³Vivyoho hata ishwi tike wankebe, ne tikikundilwa kituṅwa kuitika miko ya inu shi;

⁴miya mishi ikitimiza, Mulungu azamtuma ṅwanae, akivyalwa ni mvyele, akiitika mulomongwa,

⁵kangwe awakombole waja weifika mulomongwa, kangwe liγaluke wanangwa.

⁶Kwa kuti mu wanangwa, Mulungu azaingiza mpeho ya ṅwanae mwe myoyo yenyu, ne yetibembeleza kuti: Tate ene!

⁷Kwa inu mbuli nku mtuṅwa, miya u ṅwana, ati u ṅwana, kangi u mupazi ywa Mulungu kwa mbuli ya Kilisito.

⁸Miya aho kale mushizati mumtaile Mulungu, mzatumikila milungu ishiyo milungu.

⁹Ivi lushe muhomtaila Mulungu, kangi muhotailwa ni Mulungu, muhituka zeze vituliu na kwe ija miko yeshowa nguvu, yeγenyeza ukiwa? Mukunda zeze kuitumikila vingi?

¹⁰Mwateγanya mishi na myezi na mizanya na mavuh.

¹¹Naogoha kwa mbuli ya inywi kuγamba: Hangi kwenyu nifile muku wa bule.

¹²Γalukai, sa imi nilivyo! Hambu imi ni sa inywi; wanduγu, namihembeleza.

¹³Nkamuniγoshwele mbuli mbada. Mwataila kuti: Kuja kuvoka nizamibilikila na unyonge wa ṅwili, kangi ne nikiγezwa ni viya vya ṅwili wangu,

¹⁴miya nkamunibentile, miya mzanihokela, viya ni mlau ywa Mulungu, viya ni Kilisito Yesu.

¹⁵Lushe ija nyemi yenyu i kuhi? Hambu namilongela uwona, ati mzadaha, anga mzafokola mesho yenyu, kangwe muninke.

¹⁶Miya mzaγaluka munkulu ywenyu aho nikimiγambila mbuli ya kweli?

¹⁷Waja wavyomihimila, nkavitama, miya wakunda kumiusha, kangwe mkihime kwa mbuli yawe.

¹⁸Kukihima kwa mbuli ntana kwatama, miya so haja du, nii kwenyu.

¹⁹Wanangu, nalumila viya nitemivyala ka mbili, mpaka Kilisito atende nguvu kwenyu.

²⁰Nakunda, anga ni kwenyu ivi lushe, nikaγeza milongele mituhu, hambu nizaaγilwa kwa mbuli ya inywi.

²¹Niγambilai, inywi mwekunda kuitika mulomongwa: Kumbe mwaiva mulomongwa?

²²Hambu kuigondiγwe kuti: Abulahamu ne ainawana waili, muṅwe azamvyala na mndele ywa kituṅwa, muṅwe azamvyala na muke ṅwenye.

²³Miya yuja ywa mndele ywa kituṅwa avyelwe kwa mbuli ya kihelehele, yuja ywa muke ṅwenye avyelwe kwa mbuli ya uja msuhi.

²⁴Ivi vifanana, viya ni lushimo, bontokelo shiji: Vilaγa ni vili; kiṅwe ni chiya chilawilecho he mulima wa Sinai, chivyala watuṅwa du, ichi ni Hagali.

²⁵Hambu uko Alahiya mulima wa Sinai uitangwa Hagali. Kangi yuja Hagali ni Yelusalemu wa ivi lushe, hambu uikala utuṅwa haṅwe na wanae;

²⁶miya uja Yelusalemu we mwe lwingu ni ṅwana vyale, ne mine ja ishwi;

²⁷hambu kuigondiγwe: Tamilwa, iwe mγumba ushiwovyala! Kishekeze! Towa zumo, ushiwotenda nda! Hambu yuja rawe ike aua wana waugi kuzinka yuja mwena mγoshi.

²⁸Miya inywi, wanduγu, mu wana wa msuhi sa Isaka.

²⁹Sa aho kale yuja avyelweye kwa kihelehele avyomshongeleza ṅwiyae avyelweye kimpeho, ne vilivyo hata ivi lushe.

³⁰Miya ugondengwa uγamba ze? Mwingate yuja mndele haṅwe na ṅwanae! Hambu ṅwana mtuṅwa nkezeapale na ṅwana vyale.

³¹Kwa inu mbuli, wanduγu, nkati wana mtuṅwa, miya ti wana vyale.