Read Kishambala Wagalatiya 5 Bible Online

Wagalatiya 5 - Kishambala bible

Wagalatiya 5

¹Kilisito azatikombola, tilawe mwe utuṅwa. Lushe toγai, mshozakundilwa vituhu uwo utuṅwa welumiza!

²Shivyo, imi Paulo nivyomiγambila: Mkikunda kushengwa, Kilisito nkana ndivyo nezeamionele.

³Vituhu kila mwekunda kushengwa namlonga uwona kuti: Mpaka aγoshole mulomongwa woshe!

⁴Nyoshe mwekunda kuinkwa utanda na kuγoshola mulomongwa mzabinda kuushiγwa ha Kilisito, mzalekela mbazu ngwa.

⁵Miya ishwi kwa nguvu ya mpehongwa taafiza na kutozesha uwo utanda, tiwoalila.

⁶Hambu tikianga na Kilisito, vyetinka nguvu so kushengwa, so kusheshengwa, miya ni mitozesheze yebontoka na kukundishana.

⁷Ne mkianga vitana; ni ndai amifingizizeye, msheitike vye kweli?

⁸Inu mikengelezeze nkaianduka kwayuja amiitangeye.

⁹Vishimbi vidashi vyakoleza kiγa kigima cha holwe.

¹⁰Viya muvyoanga na Zumbe, namialila kuti: Nkezemγuwe ntongonyezi ntuhu, miya yuja mwemiazaγanya atazakola masa, ati ni muntu ani!

¹¹Miya imi, wanduγu, ati nikebilikila kushengwa, anga niifiziγwai?

¹²Anga kiihizize cha mutingwa chizauka. Wakataushiγwa wemiazaγanya!

¹³Hambu inywi, wanduγu, mwaitangilwa, mγaluke wanavyale, komo kuja kuγaluka wana vyale mshekugwize na kwe kihelehele cha mili yenyu, miya mtumikilane na kukundishana!

¹⁴Hambu mulomongwa woshe wabontoka na inu mbuli ya kuγamba: Shuti umkundishe ṅwiyawo, sa uvyokikundisha ṅwenye!

¹⁵Miya mkilumana, mkijana, oleleshai, kangwe mshezabindana!

¹⁶Naγamba: Angai kimpeho! Ne ndivyo mshedahe kubontola kihelehele cha mili yenyu;

¹⁷hambu ṅwili una kihelehele na viya vyeihila mpehongwa, kangi mpehongwa ina kihelehele na viya vyeihila ṅwili, ivyobo awa waili waomana, kangwe wenye mshedahe kuγoshola muvyokunda.

¹⁸Miya mkihimilwa ni mpehongwa, lushe nkamu watuṅwa wa mulomongwa.

¹⁹Miγoshwele ya kiṅwili iibunkuke, kuti ni kilanga, usaba, mulako, uvika mizimu,

²⁰ushai, nkulu, nkumbizi, wizu, maya, mbifya, mizinkano, misopano, kushukizanya, kukomana,

²¹kunywelesha, kujilisha na vituhu vyefanana na Ivi; nizamiγambila kale, kangi nitauγiza kulonga kuti: Weviγoshola viya nkezewapale uzumbe wa Mulungu.

²²Kuwo ja mpehongwa shiji: Kukundishana, kutamilana, kuivana, kuzizimiza, kulonga na ukuwi, kufilana mbazi, kutozesha,

²³ubozu, kukitoza. Ivi vyoshe nkavilemelwa ni mulomongwa.

²⁴Wantu wa Kilisito Yesu wakoma mili haṅwe na luzisho na kihelehele.

²⁵Ati ti wa kimpeho, netiange kimpeho!

²⁶Tisheγaluke welonda ntogolo ya bule, tikihimilana vibada, tikitendelana wizu!