Read Kishambala Wagalatiya 6 Bible Online

Wagalatiya 6 - Kishambala bible

Wagalatiya 6

¹Wanduγu, ati muntu azavotwa ni kilema, ishwi wa kimpeho timshunde kimpeho na uhozu! Ukioleleshe ṅwenye, nawe ushezaγezwa ni iyo mbuli!

²Inwilanai miziγo! Ne ndivyo mubontole mulomo wa Kilisito;

³hambu mwekifanyanyiza ṅwenye kuti: Ni mnguvu, kangi siye, akiufya ṅwenye;

⁴miya kila muntu aoleleshe miγoshwele yakwe ṅwenye! Ne ndivyo akitogole mwe moyo wakwe ṅwenye na kushevilaviliza kwa mtuhu.

⁵Hambu kila muntu ainule mziγo wakwe ṅwenye.

⁶Yuja mwefuziγwa mbulingwa amupangile mfuzi vitana vyoshe, avyona navyo!

⁷Msheufiγwe! Mulimgu nkabelwa, hambu muntu avyohanda, ne ndivyo aonele;

⁸mwehanda mwe ṅwili wakwe atazaonela mwe uwo ṅwili kubanika; mwehanda mwe mpehongwa atazaonela mwe iyo mpehongwa nkalamo ya kale na kale.

⁹Tishetibuke kuγoshola viya vyetama! Hambu hakizabula, titazavionela, ati nkatihelele gati.

¹⁰Kwa kuti tike kunu, netikihime kuγoshwela wantu woshe vitana, tiisiize waja wetozesha haṅwe na ishwi!

¹¹Olelai migondele, nimigondeleyo na mkono wangu!

¹²Wekunda, mtamilwe ndiwo kiinushi, ue wemikundila kushengwa, so kwa mbuli ntuhu, ni kwa kuγamba: Washezalumila kwa mbuli ya mutingwa wa Kilisito!

¹³Kangi awa wenye weshengwa nkawatozesha mulomongwa, watakunda du, inywi mshengwe, kangwe wakitogole na mili yenyu.

¹⁴Imi sikunda kukitogola kushima na mutingwa wa Zumbe ywetu Yesu Kilisito, hambu inu shi izanikomelwa nawo; nami nizaikomelwa inu shi.

¹⁵Wina Kilisito Yesu, kushengwa siko, hata kusheshengwa siko, miya kiumbo kihya ndicho.

¹⁶Woshe weanga na unu mulomo, waikale mpeho, wafilwe mbazi haṅwe na Waisilayeli wa Mulungu!

¹⁷Vikibinda kusheoneke mwenionya lulali! Hambu mwe ṅwili wangu nina nkozu za Yesu.

¹⁸Mbazi ya Zumbe ywetu Yesu Kilisito iγolokele mpeho zenyu, wanduγu! Amini.