Read Kishambala Waefeso 1 Bible Online

Waefeso 1 - Kishambala bible

Waefeso 1

¹Imi Paulo ni ntuṅwa ya Kilisito Yesu kwa viya, Mulungu akundilevyo; namiluγusha inywi waṅazi uko Efeso na waja wemtozesha Kilisito Yesu.

²Mbazi imiikaile na mpeho yeanduka kwa Mulungu, Tate yweshu, na kwa Zumbe Yesu Kilisito!

³Atogolwe Mulungu, ishe ja Zumbe ywetu Yesu Kilisito, kuti azatifa mbazi na vitana vyoshe vya kimpeho vyeanduka mwe lwingu kwa Kilisito!

⁴Hambu ngulu ngima ishizati itulwe, azatishaγula, tiγaluke wakwe, kangwe tiγaluke waṅazi weanga kishimasa, akiwaolela;

⁵kwa lukundisho lwakwe aatiteγanya uko kale, tiγaluke wanae wenye kwa mbuli ya Yesu Kilisito, ne vimtamilevyo, ne akundilevyo,

⁶kangwe nezetitongele mbazi zakwe ntana, atifilezo kwa uyu ṅwanae, ayemkundisha.

⁷Hambu mwe mpome yakwe ne timoonela ukombozi, tidsheushiliziγwa tibanilevyo.

⁸Izi mbazi zakwe zizatilawila hata ishwi nyingi, zizatinka viyuγo vyoshe na lutwi lwoshe,

⁹akitifumbwila viya avyokunda, vyemtamila, vishivyotailikana kale hoshe; hambu aviteγanya kale mwe moyo wakwe,

¹⁰vihontokele, mishi aikileyo ndiho nezeitimize, Kilisito aγaluke mutwi wa viya vyoshe vye mwe lwingu na vye kunu shi.

¹¹Kwa mbuli ya uyu tapangilwa kifu hata ishwi chifanyanyiγwecho kale kwa viya, aikilevyo uko kale, hambu vyoshe avihontoleza, sa avyokunda ṅwenye.

¹²Kwa izi mbuli ishwi temwalila Kilisito mishi inu titazatogola uko utana wakwe.

¹³Hata inywi mzaiva mbulingwa ye kweli, ni uja ulau wa uvunizi wenyu; aho mkitozesha mzainkwa ndiye lwitangilo, ni Mpeho mṅazi mwebontola kilaγa;

¹⁴uyu ni mulimbulo wa chiya kifu, titaile kuti: Tiikombolwe, ti wakwe, kangwe nezetitogole utana wakwe.

¹⁵Lushe ivyo niivilevyo, muvyomtozesha Zumbe Yesu, muvyokundisha waṅazi woshe,

¹⁶sidila kulavya ntogolo nihokamifukila nikivika.

¹⁷Namihembelezeza kwa Mulungu ywa Zumbe ywetu Yesu Kilisito, Tate mwe utana, aminke mpeho ya viyuγo na ya ufumbuzi, mtaile alivyo.

¹⁸Kangi aṅaze mesho ya myoyo yenyu, kangwe mtaile, mwitango wakwe tiwoalila ulivyo, utana wa kifu uvyokula, aikilacho waṅazi, mtaile,

¹⁹nguvu yakwe ivyokula, avyotinka ishwi tetozesha kwa viya, tivyohimilwa ni nguvu ya ufuṅwa wakwe.

²⁰Inu azailaviliza mwe Kilisito akimfufula kwa wafilewo, akimwikaza mwe lwingu kulume kwakwe,

²¹akimgimbika kuzinka ufuṅwa na ukulu na unguvu na uzumbe woshe na kuzinka mazina yoshe yelangwa mishi inu na mishi yoshe, ndiyo itongele.

²²Vyoshe azaviika shi he milundi yakwe, ṅwenye azamγalusha mutwi wa bumbangwa kushima viya vyoshe,

²³hambu jiya ne ṅwili wakwe, ne hontokelo ja yuja mwebontoleza mbuli zoshe koshe koshe.