Read Kishambala Waefeso 2 Bible Online

Waefeso 2 - Kishambala bible

Waefeso 2

¹Hata inywi ne mwifile kwa mbuli ya uhambanyi na uhuza wenyu,

²mwangilewo nawo kwa misimo ya inu shi na kwa nguvu ya yuja mwena ufuṅwa kunu shi, ni ija mpeho yehimila nguvu yakwe mpaka inu mishi kwa wanangwa wepapalika.

³Hata ishwi toshe ne tikiangilana nawo tikitongela kihelehele choshe cha mili yelu, tikiγoshola vyoshe tivyokundilwa ni mili yetu na ntongonyezi zetu; kwa viya, ndivyo tilivyo, ne tii wana wemkweza maya sa waja watuhu.

⁴Miya Mulungu uzuli wakwe ni utungu, ne vyeleka, lukundisho lwakwe alotikundisha nalo ni lungi,

⁵ne vilekilevyo, akitiuza moyo haṅwe na Kilisito ishwi tifilewo kwa mbuli ya mabano yetu; mzavunilwa kwa mbazi du.

⁶Akibinda kutiinula haṅwe naye azatiikaza mwe lwingu haṅwe na Kilisito Yesu

⁷kangwe aonyeshe mishi, ndiyo ibule, uzuli wa mbazi zakwe uvyoisa kukula, akitiγendela na uhozu kwa mbuli ya Kilisito Yesu.

⁸Hambu ni mbazi, kuti mwivunilwe aho mkitozesha, kangi nkavianduka kwenyu, mteviinkwa ni Mulungu vivyoho;

⁹so ndima zenyu, bangwe muntu ashezahikuka.

¹⁰Hambu ishwi ti ndima yakwe; Kilisito Yesu azaleka, tikiumbiγwa, kangwe tizifye ndima, Mulungu atifanyanyizezo, tiange nazo.

¹¹Kwa ivyoho kumbukai kuti: Kale mbali yenyu muwamzimu, ne mkiitangwa mankombwe ni waja wekitogola, kuti wazashengwa mih ni mkonowa muntu!

¹²Kumbukai: Mishi ija ne mwishina Kilisito, ne mkilemeziγwa kuγaluka wenyezi kwa Waisilayeli, ne mwi waγeni na vilaγa wainkiγwevyo, ne mwishina kialilo, ne mwishina Mulungu mwe inu shi!

¹³Miya ivi lushe kwa mbuli ya Kilisito Yesu hata inywi, ndiwo mkiikala hale, mzaletiγwa na hehi ni mpome ya Kilisito.

¹⁴Uyu ni mwivano wetu, hambu yaja mabumba maili azayaγalusha iṅwe akichakula luja lukindo, ndilo lwiwatanyize akiusha nkulu yawe,

¹⁵hambu na ṅwili wakwe azausha nguvu ya ija milomo yeγenyeza vitigo na miko, kangwe waja waili awaγalushe muntu muṅwe muhya akiwaivanya.

¹⁶Na uja ṅwili wakwe muṅwe azawatemekela woshe waili kwa Mulungu aho akikoṅwa, ne ahokoma ṅwenye nkulu yawe.

¹⁷Kangi akilawila azamibilikila mwivano wedi inywi, ndiwo mwi hale, sa amibilikilevyo mwivano wedi waja, ndiwo wai hehi.

¹⁸Ne tivyoonela mwakwe toshe waili luhitile kwa Tate na mpeho ṅwenga.

¹⁹Kwa ivyoho nkamu waγeni weikala nkandai, mu wenyezi haṅwe na waṅazi, mu wakaya wa Mulungu,

²⁰hambu mzazengwa mwe jiya shikizi ja ntuṅwa na ja wateγanyi, Kilisito aliho iwe ja heta.

²¹Hambu mwe uyu ne zengo joshe gima jimokisanyiγwa, jikule, jiγaluke vikilo ṅazi ja Zumbe.

²²Ne mzengiγwemo hata inywi, mγaluke ikailo ja Mulungu ja kimpeho.