Read Kishambala Waefeso 6 Bible Online

Waefeso 6 - Kishambala bible

Waefeso 6

¹Inywi wana, itikai wavyazi wenyu, kwa kuti mu wa Zumbe!

²Hambu unu ni utanda. Gimbika isho na nyokwe! Unu ni mulomo wa bosi ugezilwewo msuhi wa kuγamba:

³Uikale mpeho, uγenyeze mishi kunu shi!

⁴Inywi waishe, mshekweze wana wenyu maya, miya wakuzei na kuwashunda, wamwitike Zumbe!

⁵Inywi watuṅwa sa muvyomwitika Kilisito, itikai wazumbe wenyu wa kiinushi na kuwaogoha na kudidima, msheγenyeze mbuli mwe myoyo yenyu!

⁶Mshezifye ndima mwiolelwe du, viya mtakunda kutamila wantu, miya kwa kuti mu watuṅwa wa Kilisito, γosholai kwa moyo, Mulungu avyokunda!

⁷Tumikai na kutamilwa, viya so wantu muwotumikila, miya viya mtamtumikila Zumbe! Tailai kuti:

⁸Kila muntu ati aγoshola ndima ntana, atazaipokela kwa Zumbe, ati ni mutuṅwa, ati ni ṅwana vyale.

⁹Hata inywi wazumbe, muwaγoshwele sa viyaho, mleke kushindawavaila mkitaila kuti: Zumbe ywawe na ywenyu a mwe lwingu, nkaolela cheni cha muntu.

¹⁰Kushilikiza wanduγu, kwa kuti mu wa Zumbe, tendai nguvu kwa iyo ntoγo ya ufuṅwa wakwe!

¹¹Tozai mata yoshe ya Kimulungu, mdahe kuikila lwufyo lwoshe lwa Satani nkani!

¹²Hanibu nkondo, tiyona nayo, so ya vye mpome na nyama, miya ni nkondo ya wazumbe na wafuṅwa na wanguvu wetoza inu shi, iikale na lwiza, na ziya mpehompeho mbada zoshe ze ulanga.

¹³Kwa ivyobo tozai mata yoshe ya Kimulungu, kangwe mdaheomana, mushi mubada ukibula, mdahevota viya vibada vyoshe mwiγoloke!

¹⁴Γolokai, mwikikantile na ukweli, mwizwikile utanda, viya ni demu ja nkondo, milundi yenyu iikantiγwe vilatu!

¹⁵Ne kukiteγa kubilikila nyemi ya mpolele.

¹⁶Kushima ivi vyoshe γuwai ngawo ya kutozesha! Ne ndiyo mdahe kuzimya nayo mivi yoshe yena molo yetambikwa ni yuja muhada! Zwikai nkofiya ya uvunizi!

¹⁷Tozal shime ya kimpeho, ni mbulingwa ya Mulungu!

¹⁸Kwa mbuli zoshe vikai na kulombeza na kuhembeleza mishi yoshe kwa nguvu ya mpehongwa! Kangi gonai mesho mkikihima kuhembelezeza waṅazi woshe,

¹⁹hata imi, nifilwe mbazi, nishungulwe kanwa changu kwa bilikila mbulingwa, niukule na nyemi ulau ushiwotailikana kale hoshe, niwotumikila hata niishungiγwe,

²⁰niγoshole iyo ndima yangu na nyemi vivyoho, nilonge sa vivyoniagiza!

²¹Miya kangwe hata inywi mtaile, mbuli zangu ziγendilevyo, nilivyo aha, vyoshe atamiukwila mnduγu Tikiko, niyemkundisha, kwa kuti ni muluγojo mkoolezi ywa Zumbe.

²²Uyu nizamtuma na kwenyu kwa iyo mbuli, kangwe mtaile, mbuli zetu zilivyo, kangwe ashangaiaze myoyo yenyu.

²³Mpeho na wanduγu, watende lukundishano na mitozesheze yeanduka kwa Mulungu Tate na kwa Zumbe Yesu Kilisito!

²⁴Mbazi iikaile woshe wemkundisha Zumbe ywetu Yesu Kilisito na kusheleγela! Amini.