Read Kishambala Wafilipi 1 Bible Online

Wafilipi 1 - Kishambala bible

Wafilipi 1

¹Imi Paulo na Timoteyo, te watuṅwa wa Kilisito Yesu, tawagondela waṅazi woshe baluwa wena Kilisito Yesu, weikala Filipi, haṅwe na waolezi na watumikizi.

²Mbazi imiikaile, na mpeho yeanduka kwa Mulungu, Tate yweshu, na kwa Zumbe Yesu Kilisito!

³Namtogola Mulungu ywangu hoshe nihokamikumbukila,

⁴hambu mishi yoshe nihokamihembelezeza inywi nyosheni nivika na nyemi,

⁵kwa kuti mwaangilana na ulaungwa wedi aho mwandiileho mpaka ivi lushe.

⁶Ne vyeleka, nikialila aha kuti: Yuja avokileye kwenyu ndima ntana nezeaibontoleze mpaka kwa mushi wa Kilisito Yesu.

⁷Ne vyeniagiza kumitongonyeza nyosheni ivyoho, hambu inywi nkamuniuka mwe moyo, ati nashungwa, ati nakanila ulaungwa wedi nikiuukula na nguvu kuti: Inywi nyoshe na imi toshe tipangilwe mbazi ṅwenga. Mwona ywangu ni Mulungu,

⁸nivyobulwa ni luzwi na inywi nyosheni kwa mbazi za Kilisito Yesu.

⁹Nahembeleza inu mbuli ṅwenga, kukundishana kwenyu kuisiize kuγenela vivyoho vivyoho haṅwe na utalizi kwa viya, muvyotenda viyuγo na shoni zoshe,

¹⁰mdahebunkula vishiivanavyo, kangwe nezemlawile mushingwa wa Kilisito mwiṅaziγwe uhambanyi woshe,

¹¹mwiγenyeze kuwo ja utana mwinkiγwewo ni Kilisito Yesu, kangwe Mulungu agimbikwe, atogolwe.

¹²Miya nakunda, mtaile inywi kuti: Masa yangu yazaleka, ulaungwa wedi uγende,

¹³kwa kuti mazolo yangu yamanyika lushe kunu bomani koshe, hata kosheni kutuhu kuti: Nishungwa kwa mbuli ya Kilisito Yesu.

¹⁴Hata wanduγu wetu wangi wa Kikilisito wadesiγwa ni mazolo yangu, kangwe wohe waγezeγeze kubilikila mbulingwa ya Mulungu na kusheogoha.

¹⁵Ni kweli kuti: Kuṅwe wamubilikila Kilisito kwa wizu na lushongelezo, miya kuṅwe watamilwa kweli.

¹⁶Awa ne wenikundisha, wataila, kuti niikwa kunu, kangwe nikanile ulaungwa.

¹⁷Waja wemubilikila Kilisito, kangwe wanishongeleze, nkawazifya, hambu wenye wagomba, wanionye ukiwa mwe mazolo yangu.

¹⁸Miya vinai? Komo Kilisito abilikilwe na mibilikile mingi, ati ni ya ulongo du, ati ni ya kweli, ne vyenitamila.

¹⁹Hata uko nyuma nezenitamilwe, hambu nataila, kuti ivi nezevibontokele na kwe uhonya, kwa kuti mwanihembelezeza, kangi naambiziγwa ni mpehongwa ya Yesu Kilisito.

²⁰Ne vyeleka, nikiafiza, nikialila kuti: Sezenibimkuke mwe mbuli ṅwenga du, miya sa kale hoshe hata ivi lushe nezevimanyike vyedi kuti: Kilisito agimbikwa ni unu ṅwili wangu, ati ni moyo, ati niyafa.

²¹Hambu imi kuikala kwangu ui Kilisito, kangi kufa ni luhanda vivyoho.

²²Ati ni kuneikala kwa ṅwili, ne kuonela kuwo ja ndima yangu; ne nihoshetaila, ndivyo nishaγule.

²³Naangwa ni moyo kwa izi mbuli mbili: Natamilishiγwa nikilaga kunu shi, nikaikale haṅwe na Kilisito, kangi ivi vyatama kuzinka.

²⁴Miya kuhumula kwa ṅwili kunitala kwa mbuli ya inywi.

²⁵Ne nivyotoza nikitaila kuti: Nezeninyamale, nezeniikale haṅwe na inywi nyoshe, kutozesha kwenyu kuisiize, mwone nyemi nako,

²⁶kangwe mdahe kukiombola na Kilisito Yesu, kangi na imi, nikizabula vituhu kwenyu.

²⁷Ntoγo mtende myangile yeivana na ulau wedi wa Kilisito, kangwe ati nazaiza, nimione, ati ni kunu hale, nimiive kuti: Mwaγolokelana na mpeho ṅwenga, kuti: Mwaambizanya nkondo na moyo muṅwe kwa mbuli ya kutozesha ulaungwa wedi.

²⁸Ivyoho nkamvotwa hata ni wabishi wenyu; waja vitawaiγala kwe mlaho, inywi vitamiiγala kwe uhonya; inu ni mbazi ya Mulungu kuti:

²⁹Mwakundiziγwa, so kumtozesha Kilisito du, miya hata kulumiziγwa kwa mbuli yakwe, mkiomanyiγwa iyo nkondo, mweneyo,

³⁰kuti ne niina nayo, kangi muyoiva, kuti hata ivi lushe nina nayo.