Read Kishambala Wafilipi 2 Bible Online

Wafilipi 2 - Kishambala bible

Wafilipi 2

¹Ati kwenyu kuna kumwitika Kilisito, ati kuna kuhembulizanya na kukundishana, ati kuna kuangilana na mpehongwa, ati kuna utungu na mbazi:

²Nimemezezai nyemi yangu, mtongonyeze ntongonyezi ṅwenga, mtende lukundishano liiṅwe na moyo muṅwe na mifanyanyize miṅwe!

³Mshetende lwifyano, mshelonde gimbi ja bule, miya mkipunguze, kila muntu adahe kumfanyanya ṅwiyae kuti: Ni mtana kunizinka imi!

⁴Kila muntu asheolele viya vyakwe, aolele hata viya vya ṅwiyae!

⁵Tendai mifanyanyize mwe myoyo yenyu sa ija ya Yesu Kilisito!

⁶Uyu ne aina shula ya Mulungu, kangi kuja kufanana na Mulungu nkakutozize viya ni mtalie,

⁷miya azakishuzula ṅwenye, azaγuwa shula ya kipuna; aho akiγalamuka kimuntu, azafanana na wantu, akiolelwa alivyo, viya ni muntu ṅwenye.

⁸Azakipunguza ṅwenye, azaitika shuti kufa, shuti kufa mwe muti.

⁹Kwa inu mbuli Mulungu azamkweza na mwe lwingu, azamunka zina jezinka mazina yoshe,

¹⁰kangi mwe zina ja Yesu mazwi yoshe yagintwe, ya waja we mwe lwingu, ya waja we kunu shi, yawaja we kuzimu,

¹¹kangwe nyimi zoshe nezezilonge cha sale kuti: Zumbe ni Yesu Kilisito, Mulungu Tate agimbikwe.

¹²Lushe weyangu niwokundisha, sa muvyoniitika mishiyoshe, ati niγuko, hata siko sa ivi lushe, pikilai uvunizi wenyuwenye na kuogoha na kudidima!

¹³Hambu Mulungu alekileye, mkinakunda, ne ndiye aleke, mkizabontola, sa avyotamilwa ṅwenye.

¹⁴Mbuli zoshe ziγosholei na kusheṅuna na kushetongonyeza mbuli nyingi,

¹⁵kangwe mwange sa wana Mulungu wa kweli kishimasa na kishishundwe, kwa kuti mwikala gati kwe mbali ya wantu wabada weifya myangile.

¹⁶Hambu awa ne muwopwinkula, sa malangaila yavyopwinkula inu shi. Tozai mbuli ya nkalamo, mushi wa Kilisito nione wenitogola kuti: Siγulukile mhotwe bule du, kuti: Sipikile bule du.

¹⁷Hata vikinitala kukoṅwa, viya ni ṅombe ya mviko, nikimitumikila, kangwe kutozesha kwenyu kuisiize, niyatamilwa, kangi niyatamilwa na inywi nyoshe.

¹⁸Vivyoho hata inywi tamilwai! Netitamilwe toshe kiṅwe!

¹⁹Ati Zumbe Yesu akunda, naalila kumtuma Timoteyo na kwenyu mishi inu, moyo unisheele, nikitaila mbuli zenyu.

²⁰Hambu sina niyeivana naye ivyoho, mweγolokela mbuli zenyu na utanda.

²¹Hambu woshe walonda viya vyawe, nkawalonda viya vya Kilisito Yesu.

²²Akikaokwa moto, mwataila, kuti nkahyele; hambu sa ṅwana avyomγoshwela ishe ndima, azaγoshola haṅwe na imi ndima ya kubilikila.

²³Uyu naalila kumtuma aho, ndiho nezenitaile, ndivyo mbuli zangu zihite kwa bontoka.

²⁴Miya naalila kwa Zumbe kuti: Nami nezenifikeiza.

²⁵Miya nizaγamba, shuti nimlongoze Epafulodito; uyu ni mnduγu na mndima na mnkondo ṅwiyangu kangi ni ntuṅwa yenyu mwenihilika viya, nivyoagiziγwa ndivyo.

²⁶Hambu ne aina luzwi na inywi nyoshe, azaona ukiwa, kwa kuti mzaiva, kuti azahuma.

²⁷Kweli azahumisha, azabuza kufa, miya Mulungu azamfa mbazi uyu hata imi, nisheisiize kujiγwa ni lusoyoyo.

²⁸Lushe nizamtuma nguzunguzu, kangwe mtamilwe vituhu mkimwona, imi nami ukiwa wangu upunguke.

²⁹Lushe mhokelei kwa mbuli ya Zumbe na nyemi yoshe, mgimbike wantu we ivyoho!

³⁰Hambu kwa mbuli ya ndima ya Kilisito azabuza kufa akikiinkila ṅwenye, kangwe amibontwele ziya ndima, mshiγazezo kuniγoshwela.