Read Kishambala Wafilipi 4 Bible Online

Wafilipi 4 - Kishambala bible

Wafilipi 4

¹Lushe inywi wanduγu wangu, namikundisha, mwanibuza luzwi, mu nyemi yangu na linga jangu; kwa ivyoho, weyangu, γolokai mwina Zumbe!

²Namshunda Ewodiya na Sintike, nawahimila, waivane kwa mbuli ya Zumbe.

³Hata iwe ṅwiyangu mtana, nakuhembeleza, uwamanye waja waenewo nkondo haṅwe na imi kwa mbuli ya ulaungwa haṅwe na Kilemesi na waja woshe watuhu, ndiwo wakiniambiza, wagondiγwewo mazina mwe kitabu cha nkalamo! Tamilwai kuti muna Zumbe mishi yoshe!

⁴Namilonga vituhu: Tamilwai!

⁵Ukuwi wenyu utailwe ni wantu woshe! Zumbe a hehi.

⁶Msheje sungu hata! Miya mbuli zoshe, muzona nazo, ziiγalei kwa Mulungu mkimvika, mkimhembeleza haṅwe na kumtogola!

⁷Kangi utondolo wa Mulungu wekula kuzinka ntongonyezi zoshe uγolokele myoyo yenyu na mitongonyezeze yenyu, mwangilane na Kilisito Yesu!

⁸Vikibinda, wanduγu, tongonyezai viya vya kweli, viya vya tae, viya vya utanda, viya vya uṅazi, viya vye mulile, vyetama kulongwa, vyezifya mbuli, vyeagiza kutogolwa!

⁹Ne niuhinilevyo, ne muhokelevyo, ne mwivilevyo, ne mwenevyo kwangu; viγosholei! Ne ndivyo Mulungu mwe utondolo aange na inywi.

¹⁰Nizatamilwa vikulu kuti nina Zumbe, kwa kuti mzaγuwa vingi iyo ndima ya kunilondelalondela viya, nivyoagiziγwa ndivyo, sa viyaho mwanilondelavyo kale, miya mishi ya gati mshetakombaγanya du.

¹¹Silonga ivyoho kuti: Nitekosa, hambu nizazwela kuiγuta na viya, nivyona navyo.

¹²Nataila kupunguzwa, nataila kuγenyeza, vyoshe vyoshe si mγeni navyo: Kuiγuta na kushowa nkande, kuγenyeza na kukosa,

¹³vyoshe nividaha kwa nguvu ya yuja mweninka uguvu.

¹⁴Miyamzazifya mkinihongeza mwe nkiwa wangu.

¹⁵Hata inywi Wafilipi mwataila kuti: Viya niandiilevyo kuhilikila nikilawa Makedoniya, nkahana bumba tuhu jinipangilejo, tikitala nawo wavyoinkwa na wavyolavya, ni nywiyo ike.

¹⁶Hata nikiikala Tesalonike, mzanitumiziza kaṅwe, hata kaili vyeniagiza.

¹⁷Sitalonda, niinkwe imi, miya nilonda vyekuza kuwo jenyu.

¹⁸Vyoshe vyeniagiza nina navyo na kuzinka, nizaγenyeza kabisa nikiletelwa ni Epafulodito viya vyenyu, vina mzingo wa mulile, viya ni ṅombe ntana ya mviko yemtamila Mulungu.

¹⁹Mulungu ywangu amiγenyezeze vyoshe vyemiagiza kwa uzuli wakwe weanduka mwe utana wa Kilisito Yesu!

²⁰Mulungu, Tate yweshu, agimbikwe kale ua kale! Amini.

²¹Niluγushizai kwa waṅazi woshe wena Kilisito Yesu!

²²Wanduγu we haṅwe na imi wamiluγusha. Waṅazi woshe wamiluγusha, weisiiza ni waja walawilewo mwe kitala cha Kaiza.

²³Mbazi ya Zumbe Yesu Kilisito iikaile mpeho zenyu! Amini!