Read Kishambala Wakolose 1 Bible Online

Wakolose 1 - Kishambala bible

Wakolose 1

¹Imi Paulo nigimbikweye ntuṅwa ya Kilisito Yesu kwa viya, Mulungu akundilevyo, na mnduγu Timoteyo,

²tamigondela baluwa inywi wanduγu wetu waṅazi wa Kolose mwemtozesha Kilisito; mbazi imiikaile na mpeho yeanduka kwa Mulungu, Tate yweshu!

³Tamlaviliza Mulungu, ishe ja Zumbe ywetu Yesu Kilisito, ntogolo hoshe tihokamifukila tikivika.

⁴Hambu tizaiva, muvyomtozesha Kilisito Yesu, kangi muvyokundisha waṅazi woshe.

⁵Hambu mwatozesha kialilo cha viya, muvyoikilwa mwe lwingu; mzaiva kale mkibilikilwa mbulingwa ye kweli, muyona nayo mishi inu.

⁶Sa ivyoγenda mwe ngulu ngima ikivyala kuwo, kangi ikikula, vivyoho izatenda hata kwenyu, izaandiila uja mushi mwandiilewo kuiva na kutaila mbazi za Mulungu,

⁷kuti ni za kweli, sa viyaho mufuziγwevyo ni mtuṅwa ṅwiyangu Epafula, niyekundisha; uyu azamiγalukila muluγojo mkoolezi ywa Kilisito,

⁸kangi ne atishimweleye lukundisho lwenyu lwa kimpeho.

⁹Ne vyeleka, hata ishwi, vivyo timiivilevyo, nkatidila kumivikila na kumihembelezeza, kangwe mwisiize kutaila avyokunda, mγenyeze viyuγo na unyanyi wa kimpeho,

¹⁰mtende myangile yedaha kumtamila Zumbe vitana, mtende kuwo ja kuγoshola ndima zoshe ntana, mwisiize kumtaila Mulungu.

¹¹Mgelwe nguvu zoshe kwa viya, utana wakwe uvyona nguvu, mtende uzizimizi na uhozu, mumlavilize Tate ntogolo na nyemi,

¹²kwa kuti azamiliγanya, mdahepangilwa kifu cha waṅazi che mwe langaila!

¹³Kwa kuti azatikombola mwe ufuṅwa wa lwiza, azatituliza na mwe uzumbe wa ṅwanae, ayemkundisha.

¹⁴Mwe uyu ne timoonela ukombozi, ne timoushiliziγwa mahuza.

¹⁵Uyu afanana na Mulungu ṅwenye ashioniγwaye, avyelwe, vyumbo vyoshe vishizati viteγwe,

¹⁶hambu mwe uyu ne vintu vyoshe viumbiγwemo, viya vye mwe lwingu na vye kunu shi, vyeoniγwa na vishivyooniγwa, ati ni vitivya kizumbe, ati ni vitala, ati ni uzumbe, ati ni ufuṅwa, vyoshe viumbiγwe ndiye, kangi vyamlala.

¹⁷Ṅwenye ne ai haho, vyoshe vishizati vilawe, kangi vyoshe vitoziγwa ndiye.

¹⁸Ṅwenye ni mutwi wa ṅwili, ni kuγamba wa bumbangwa, kangi ni ywa kuvoka, kangi ni mulimbulo wa wafilewo, kangwe ṅwenye awalongwele mwe mbuh zoshe.

¹⁹Hambu ne vimtamilevyo Mulungu, vyosheni viikale mwakwe,

²⁰vyoshe vikombolwe ndiye, viuye na kwakwe, hambu na mponie yakwe iitikeyo he muti azavitundwaza, ati ni viya vye kunu shi, ati ni viya vye mwe lwingu.

²¹Hata inywi kale ne mwi waγeni naye, kangi ne mwi wankulu wakwe, kwa mifanyanyize yenyu mzaanga na mbuli mbada.

²²Miya ivi lushe azabinda kumikombola, na ṅwili wakwe wa kimuntu aho akifa, kangwe aleke, mγaluke waṅazi washinawo danko, washinawo masa, hata ṅwenye akimiolela.

²³Ntoγo mwikale na kutozesha sa wantu wena shikizi jetoγa, msheushiγwe he kialilo cha ulaungwa, mwivilewo, webilikilwa kwa woshe we moyo kunu shi, niwotumikila imi Paulo.

²⁴Lushe naona nyemi na viya, nivyolumiziγwa kwa mbuli ya inywi, kangi viya vya ukiwa, Kilisito ashiγazevyo, na ṅwili wangu nivibontolezeza ṅwili wakwe, ni kuγamba bumbangwa, hambu ne nijotumikila kwa uja ufuṅwa,

²⁵niinkiγwewo ni Mulungu, nimibontwele mbulingwa ya Mulungu.

²⁶Ichi ni kihili chifishiγwecho kale kwa watate zeshu, miya ivi lushe waṅazi wakwe wazachifumbwilwa.

²⁷Hambu ne Mulungu akundilewo kuwaonyesha, utana uvyokula wa chiya kihili, akundilecho kuγoshola kwa wamzimu; chizabontoka, Kilisito akiingila mwenyu, uyu ne utana wealilwa.

²⁸Hata ishwi tamubilikila tikimshunda kila mimtu, kangi tikimhinya kila muntu na viyuγo vyoshe kangwe kila muntu nezetimwike, aizifize, kuti ana Kilisito.

²⁹Ne nivyokionya lulali nikihimila inu mbuli kwa uja ufuṅwa wakwe wenigela nguvu.