Read Kishambala Wakolose 3 Bible Online

Wakolose 3 - Kishambala bible

Wakolose 3

¹Ati mzafufulwa haṅwe na Kilisito, londai viya vya lwingu! Ne Kilisito ahoikala kulume kwa Mulungu.

²Tongonyezal viya vya lwingu, mshetongouyeze vya Inu shi!

³Hambu mzafa, nkalamo yenyu ifishiγwe haṅwe na Kilisito kwa Mulungu.

⁴Aho ndiho Kilisito, nkalamo yenyu, nezealawile, ne ndiho nezemulawile mwe utana haṅwe naye.

⁵Komai lushe vya mili yenyu ya kiinushi: Kilanga, uhuza, kihelehele, luzisho lubada, tamaa ya mali yefanana viya ni kutumikila mizimu!

⁶Hambu ivi ne vyemkweza Mulungu maya.

⁷Kale hata inywi mzaanga navyo aho mkiikala navyo.

⁸Miya lushe hata inywi shuti muvitowe hulu viya vyoshe, maya na nkunguka na ubada na lukanko na mbuli mbada, ndizo mkilonga.

⁹Msheufyane! Mwizulile muntu ywenyu ywa kale na miγoshwele yakwe!

¹⁰Mwizwikile yuja muhya auziγweye uhya, atende viyuγo, kwa viya avyofanana na yuja amteγileye.

¹¹Ne nkahana aho Mgiliki na Muyuda, kushengwa na kusheshengwa, mubabashi na Msikita, mtuṅwa na ṅwana vyale, miya vyoshe mwe mbuli zoshe ni Kilisito.

¹²Inywi waṅazi, mshaγulwewo ni Mulungu, mwekundishiγwa ndiye, tendai utungu wena mbazi, ukuwi,

¹³udodo wa myoyo, uhozu, uzizimizi, mzizimize kila muntu ṅwiyae, mwushilizanye, ati muntu ana mbuli na ṅwiyae! Sa Zumbe avyomiushiliza vyenyu, vivyoho γosholai hata inywi!

¹⁴Miya kuzinka ivi vyoshe tendai lukundisho! Hambu ne lwebontoleza na kuivanya.

¹⁵Mpolele ya Kilisito ifanyanyize myoyo yenyu! Hambu ne mwitangilweyo na uja ṅwili muṅwe, mγaluke wantu welavya ntogolo.

¹⁶Lekai, mbuli ya Kilisito iγaluke uzuli wenyu, muwoikaila mkikihinya haṅwe na kukishunda na viyuγo, mkimwimbila Mulungu mwe myoyo yenyu mazumo na maimbo na mawila ya kimpeho, kwa kuti mzafilwa mbazi!

¹⁷Vyoshe, ndivyo mγoshole, ati ni vya longa, ati ni vya ndima, vyoshe viγosholei mwe zina ja Zumbe Yesu mkimlaviliza Mulungu Tale ntogolo navyo!

¹⁸Inywi wavyele, itikai waγoshi wenyu, sa vivyomiagiza, kwa kuti mu wa Zumbe!

¹⁹Inywi waγoshi, kundishai wavyele wenyu, mshewafile maya!

²⁰Inywi wana, itikai wavyazi wenyu mwe mbuli zoshe! Hambu ne vyemtamila Zumbe.

²¹Inywi waishe, msheshongeleze wana wenyu, kangwe washefe maya!

²²Inywi watuṅwa itikai wababa zenyu wa kimuntu mwe mbuli zoshe, so kuγamba: Mzifye mwiolelwe ndiwo, viya mtakunda kutamila wantu, miya muitike na myoyo yelonda mbuli ṅwenga du na kumwogoha Zumbe!

²³Vyoshe muvyoγoshola viγosholei kwa moyo, viya mshetaviγoshwela wantu, miya viya mtevimγoshwela Zumbe!

²⁴Tailai kuti: Mtazaviuziziγwa ni Zumbe, mkizahokela kwakwe kifungwa. Mtumikilei Zumbe Kilisito!

²⁵Hambu mwebana atazanziziγwa abanilevyo; nko nkakuna ywa koma na ywa limbika.