Read Kishambala Wakolose 4 Bible Online

Wakolose 4 - Kishambala bible

Wakolose 4

¹Inywi wazumbe, inkai watuṅwa wenyu vyewaagiza kila muntu sa ṅwiyae! Tailai kuti: Hata nenywi muna Zumbe mwe lwingu!

²Kihimei kuvika, mshetibuke kulavya ntogolo!

³Mtihembelezeze hala ishwi, Mulungu atizuγwile luvi lwa mbulingwa, tidahebilikila mbuli ya Kilisio ifishiγweyo, ilekileyo,

⁴nikishungwa, niifumbule, sa vivyoniagiza kuilonga!

⁵Waja we se angilanai nawo na viyuγo! Manyai mishi mwinkiγweyo!

⁶Milongele yenyu shuli itende mulile hosheni, viya itetamiziγwa ni munyu, mtaile, ndivyo mumlandule kila muntu mwemiuza!

⁷Mbuli zangu zoshe zilivyo, Tikiko atamishimwela, uyu ni mnduγu, niyemkundisha, ni muluγojo mkoolezi, ni mtuṅwa ṅwiyangu kwa mbuli ya Zumbe.

⁸Nizamtuma kwenyu, mfiketaila, mbuli zetu ziγendilevyo, kangwe ashangalaze myoyo yenyu.

⁹Ana ṅwiyae Onesimo, ni mnduγu inwe kweli, niyemkundisha, aanduka kwenyu. Awa watamishimwela mbuli zoshe za kunu.

¹⁰Mwaluγushiγwa ni Alisitaliko ashungiγweye haṅwe na imi na Maliko, yuja ṅwehwa ywa Balinaba, ni yuja mumlaγiliziγweye; ndiho aizile kwenyu, mhokelei vitana!

¹¹Kangi ni Yesu mweitangwa Yusito. Ne weanduka kwa waja washengiγwewo. Awo du ni wandima weyangu, niwoγesa nawo uzumbe wa Mulungu, ne wenishangalaza.

¹²Mwaluγushiγwa ni Epafula mweanduka kwenyu; ni mtuṅwaywa Kilisito Yesu, amigombela nkondo na kumihembelezeza, mγaluke wantu webontoleza, mtaile vyoshe, Mulimgu avyokunda.

¹³Namulongela uwona kuti: Aona lulali lungi kwa mbuli yenyu na kwa mbuli ya Walawodikiya na ya Wahiyelapoli.

¹⁴Mwaluγushiγwa ni Luka, yuja mγanga, niyemkundisha, na Dema.

¹⁵Niluγushizai kwa wanduγu wa Lawodikiya na kwa Nimufa na kwe bumbangwa je mwe nyumba yakwe!

¹⁶Inu baluwa ikibinda kufyomiγwa kwenyu, lekai, ifyomiγwe hata kwe bumbangwa je Lawodikiya, kangi ija ya Lawodikiya hata inywi mwifyome!

¹⁷Akipo mγambilei: Manya ndimangwa uinkiγweyo ni Zumbe, uizifye!

¹⁸Iji tulo nizajigonda ṅwenye na mkono wangu, imi Paulo; fukilai aya mazolo yangu! Mbazi imiikaile! Amini.