Read Kishambala 1. Watesalonike 2 Bible Online

1. Watesalonike 2 - Kishambala bible

1. Watesalonike 2

¹Hambu wenye mwataila, wanduγu, tiingilevyo kwenyu, kuti nkatiizile bule.

²Kuja Filipi ne tikilumiziγwa, ne tikitungulukwa, sa muvyotaila, kangi tiitoγilwe ni myoyo kuti tina Mulungu, tilonge kwenyu ulau wedi wa Mulungu, hata ntoγo zikiγenela;

³hambu viya timishundilevyo so vya kumiazaγanya ao kumiufya ao kumizunganya,

⁴miya kwa viya tivyobinda kutailwa ni Mulungu, tiinkwe ulaungwa, ne tivyolonga, so kuγamba: Titamile wantu, miya timtamile Mulungu mwebunkula myoyo yetu.

⁵Hambu nkatalongile na upepe, sa muvyotaila, kangi nkatakionyizeonyize, viya titefisha mimotele, aho Mulungu ni mwona ywetu;

⁶kangi nkatitalonda ntogolo kwa wantu, ati ni nywiyo, ati ni watuhu.

⁷Titadaha kukihikula kuti: Ti ntuṅwa za Kilisito, miya kwenyu ne tii wakuwi, sa mvyele mweonkeza wanae avyowakengeleza.

⁸Kwa ivyoho ne tiina luzwi na inywi, kwa kuti tizakunda kumipangila ulau wa Mulungu haṅwe na kuminka myoyo yetu, kwa kuti tiitamilwe ni nywiyo.

⁹Mwafukila, wanduγu, muku na lulali lwetu: Tizabilikila kwenyu ulau wa Mulungu haṅwe na kuγoshola ndima kilo na mushi, kangwe tishemigele wasiwasi.

¹⁰Inywi mu waona haṅwe na Mulungu kuti: Inywi mwetozesha tizamiangila na uhozu na utanda kishimasa.

¹¹Vituhu mwataila kuti: Tizamishunda nyoshe ike ike, sa mγoshi avyoshunda wanae;

¹²tizamishunda, tizamihembeleza, tizamiγambila uwona, kangwe mtende myangile yeivana na Mulungu mwemiitangila uzumbe na utana wakwe.

¹³Kwa inu mbuli nkatidila kumlaviliza Mulungu ntogolo kuti: Mzaiva mbulingwa ya Mulungu, tikiibilikila, mzaihokela, viya so mbuli ya muntu, miya ivyo kweli mbulingwa ya Mulungu mwetenda nguvu kwenyu, mkitozesha.

¹⁴Hambu inywi, wanduγu, mzatongela mabumbangwa ya Mulungu yeanga na Kilisito Yesu mwe shi ya Yudeya, kwa kuti hata inywi ne mkilumiziγwa ni mbali yenyu, sa viyaho waja wavyolumiziγwa ni Wayuda;

¹⁵awa ne wamkomilewo Zumbe Yesu na wateγanyingwa, ne wetishukiza hata ishwi, nkawamtaila Mulungu, waifyana na wantu woshe,

¹⁶waγeza kutifingiza, tishebilikile wamzimu, wakivunilwa; ne wavyobontoleza uhuza wawe koshe koshe; miya maya ya Mulungu yazabinda kuwalawila, washile.

¹⁷Ishwi, wanduγu, kwa viya tivyotanyiγwa na inywi, tisheonane mesho mishi inu, miya so uko ndai mwe myoyo, lushe luzwi lukikaza, tizapisha, kangwe tionane na inywi vyeni kwa vyeni.

¹⁸Ne vilekilevyo, imi Paulo nikikakunda kuiza kwenyu, kaṅwe hata kaili koshe, miya Satani azatifingiza.

¹⁹Hambu kialilo chetu na nyemi yetu na linga jetu, tijokiombola najo, ni mbwai, Zumbe ywetu Yesu ahozalawila, ati si nywiyo wenye?

²⁰Hambu inywi mu utana wetu na nyemi yetu.