Read Kishambala 1. Watesalonike 4 Bible Online

1. Watesalonike 4 - Kishambala bible

1. Watesalonike 4

¹Kwashiγala, wanduγu, tikimihembeleza, tikimihimila, kwa kuti mwamkunda Zumbe Yesu, mzifye vivyoho, kangi mzinke ha mishi yoshe, sa viyaho mwivilevyo kwetu, myangile yetiagiza, kangi yemtamila Mulungu ilivyo.

²Hambu mwataila milaγilizo, timinkileyo mwe zina ja Zumbe Yesu.

³Hambu Mulungu abunda, mṅaziγwe, mshelende bilanga.

⁴Kila muntu aolele, ndivyo atoze ṅwili wakwe kiṅazi na kishoni, ashetende kihelehele na luzisho,

⁵sa wamzimu washiwomtaila Mulungu wavyokatenda.

⁶Mwe mayombe muntu ashetende ukuγu, ashemfute ṅwiyae! Hambu Zumbe ne mwelahiza ivi vyoshe, sa timiγambilevyo kale na kulonga uwona.

⁷Hambu Mulungu nkatatiitangila ukandanyi, miya atiitangila uṅazi.

⁸Kwa ivyoho mwebela nkatamubela muntu, miya amubela Mulungu ṅwenye ainkileye mpeho ywakwe mṅazi na kwenyu.

⁹Kwa mbuli ya kukundishana nkamshindagondelwa, hambu inywi wenye Mulungu azamihinya kukundishana.

¹⁰Kangi mwaviγoshola kwa wanduγu woshe mwe shi ngima ya Makedoniya. Tamihembeleza, wanduγu, kangwe mwisiize kuhimila inu mbuli,

¹¹kangi munwehele kutongomala na kuolela kila muntu mbuli zakwe na kuγoshola ndima na mikono yenyu, sa timiγambilevyo kale,

¹²kangwe mwange na utanda kwa waja we se, kangwe mshezakosa vyemiagiza.

¹³Miya nkatikunda, wanduγu, mkishetaila mbuli ya waja wehita kwa sisila, kangwe mshejiγwe ni lusoyoyo, sa waja watuhu washinawo kialilo.

¹⁴Hambu ati tatozesha kuti: Yesu azafa, kangi azafufuka, vivyoho Mulungu atazaγuwa na kwakwe wahitilewo kwa sisila mwe Yesu.

¹⁵Hambu inu mbuli taimiγambila kuti: Tizailongwa ni Zumbe kuγamba: Ishwi te moyo, teshiγaziγwa, kangwe tione mushi wa mwuyo wa Zumbe, nkezetihote wasisilewo.

¹⁶Hambu Zumbe ṅwenye ndiho nezeasheele akilawa mwe lwingu, nkolo zitatowiγwa, kanwa cha mlau mkulu chitaivika, gundangwa ja Mulungu jitakema, lushe bosi wafilewo mwe Kilisito watandafufuka,

¹⁷vikibinda ishwi te moyo, teshiγaziγwa haṅwe nawo kamkaṅwe, tiiγalwe mwe mazunde na ulanga kwakintana na Zumbe, ne ndiho tiangilane na Zumbe mishi yoshe.

¹⁸Lushe shangalazanyai na izi mbuli!