Read Kishambala 2. Watesalonike 3 Bible Online

2. Watesalonike 3 - Kishambala bible

2. Watesalonike 3

¹Vikibinda, wanduγu, tihembelezezei, kangwe mbulingwa ya Zumbe iγendeshe, itogolwe sa uko kwenyu!

²Kangwe tivunilwe mwe wantu wadashi na wabada, hambu kutozesha so kwa kila muntu.

³Zumbe ni mkoolezi, atamigela nguvu, kangi atamifingiziza vibada.

⁴Inu mbuli taalila kwenyu kwa kuti: Mwaanga na Zumbe, kwa kuti: Viya tivyolaγiliza mwaviγoshola ivi lushe, hata mishi ya nyuma.

⁵Zumbe agwize myoyo yenyu na kwe lukundisho lwa Mulungu na kwe uzizimizi wa Kilisito!

⁶Tamilaγiliza, wanduγu, mwe zina ja Zumbe Yesu Kilisito, msheangilane na mnduγu mweanga kihuza, ashiyeauga na mbuli mufuziγwezo kwetu.

⁷Wenye mwataila, kuti vyamiagiza kutitongela; kangi ishwi nkatiangile kihuza kwenyu, nkatijiile nkande za muntu bule du,

⁸miya tizakihima ndima, tizaona lulali nayo na muku kilo na mushi, kangwe tishemlumize muntu kwenyu na kumjiila,

⁹so kwa kuti nkatina uwo ufuṅwa, miya kangwe timiγalukile hinilo, mdahe kutitongela.

¹⁰Hambu haja tike kwenyu taamiγambila inu mbuli kuti: Ati muntu ashekunda kuγoshola ndima, hata nkande asheinkwe!

¹¹Miya taiva kuti: Kwenyu kuṅwe waanga kihuza, nkawaγoshola ndima,

¹²miya wahakiangila du. We ivyoho tiyawalaγiliza na kuwashunda kwa kuti ti wa Zumbe Yesu Kilisito, waγoshole ndima na kushehemba, kangwe waje nkande zawe wenye.

¹³Inywi, wanduγu, mshetibuke kuγoshola vyetama!

¹⁴Ati muntu asheitika izi mbuli zetu, tigondilezo, mubunkulei, mshevangane naye! Kashokaze atazaona shoni;

¹⁵miya mshemfanyaiiye kuti: Ni munkulu! Miya mtamshunda du kinduγu.

¹⁶Zumbe ṅwenye mwedaha kutundwaza aminke mpolele koshe koshe mwe mbuli zoshe! Zumbe aikale na inywi nyoshe!

¹⁷Shiji tulo jangu na mkono wangu, imi Paulo! Ne lwitangilo lwangu mwe baluwa zoshe, ne migondele yangu.

¹⁸Mbazi ya Zumbe ywetu Yesu Kilisito imiikaile inywi nyosheni! Amini.