Read Kishambala 1. Timoteyo 1 Bible Online

1. Timoteyo 1 - Kishambala bible

1. Timoteyo 1

¹Imi Paulo nigimbikweye ntuṅwa ya Kilisito Yesu kwa mlaγilizo wa mhonya ywetu Mulungu na Kilisito Yesu mwe kialilo chetu,

²nakugondela iwe Timoteyo baluwa, u ṅwanangu ṅwenye kwa mitozesheze yako: Mbazi ikuikaile na utungu na mpeho yeanduka kwa Mulungu Tate na kwa Zumbe ywetu Kilisito. Yesu!

³Ne nikikuhimila haja nikihita Makedoniya uhumule Efeso, ulaγilize wantu,

⁴washehinye mbuli ntuhuntuhu, washeteγeleze mbuli za ushimolezi zishizo kweli na za wakale zishizohelela, zeγenyeza mikanano, kangi nkaziγesa uγolokezi wa Kimulungu weanduka mwe kutozesha.

⁵Bontokelo ja unu mlaγilizo ni lukundisho lweanduka mwe moyo weṅala ushiwotaila vibada wetozesha na kushehenya.

⁶Kuṅwe nkawatendile myoyo ye ivyoho, ne vilekilevyo, wakizahituka na kwe mbuli za bule;

⁷wakunda kuγaluka wafuzi wa mulomongwa, kangi nkawataila wavyolonga na wavyoikila nkani.

⁸Tataila, kuti mulomongwa ni mtana, ati muntu aanga nawo kimulomongwa, akitaila,

⁹kuti mulomongwa nkaulavizwe watanda, miya ulavizwe wabishi na wapapala na washeiva na wahuza, wawiwi na wahezi, wekoma waishe, wekoma wanine, wekoma weyae wawe, watesi,

¹⁰wegona na waγoshi weyae wawe, wetaγa wantu, wehenya, welonga uwona wa lulimi, weγoshola mbuli ani ntuhu ishiyoivana na ufuzi weinka wantu ugima.

¹¹Ne tivyoonyeshiγwa ni ulau wedi wa utana wa Mulungu, ṅwenye nyemi; kangi ni uja nilaγiliziγwewo imi.

¹²Namlaviliza Zumbe ywetu Kilisito Yesu ntogolo, hambu azaninka nguvu, azanifanyanya kuti: Ni mkoolezi, ne ahonigimbika, nimγoshwele ndima,

¹³imi ndiye nikikanka na kukoma na kutunguluka; miya nizafilwa mbazi, hambu nizaviγoshola tumala du, kwa kuti ne mshizati nitozeshe;

¹⁴miya mbazi ya Zumbe ywetu izaisiiza kuγenela, hata mitozesheze na mikundishize ilawileyo mwe Kilisito Yesu.

¹⁵Iuu mbuli ni ya kweli, yaagiza kutozeshiγwa ni wantu woshe kuti: Kilisito Yesu azaiza mwe inu shi, shonye wahuza; mwe awaywa bosi ni miyo,

¹⁶miya nizafilwa mbazi, kangwe mwe imi Kilisito Yesu aandiile kuonyesha uzizimizi woshe, niwaγalukile lwitangilo waja woshe, ndiwo nezewamtozeshe, wainkwe nkalamo ya kale na kale.

¹⁷Zumbe ywa ukalami woshe ashiyebanika, ashiyeoniγwa, ni Mulungu ike, agimbikwe, atogolwe kale na kale! Amini.

¹⁸Ṅwanangu Timoteyo, kwa ziya mbuli za uteγanyi zikulawilezo iwe, nakulaγiliza, uwomane nazo nkondo ntana,

¹⁹utozeshe ukitenda moyo ushiwokipanga; kuṅwe wazaasha uja moyo we ivyoho, ne vilekilevyo, mitozesheze yawe ikibanika yohe,

²⁰sa waja wakina Himeneyo na Alekisando; awa nizawamshungwila Satani, kangwe washundwe, washezakanka.