Read Kishambala 1. Timoteyo 3 Bible Online

1. Timoteyo 3 - Kishambala bible

1. Timoteyo 3

¹Inu mbuli ni ya kweli: Muntu akikunda ndima ya uwolezi, akunda ndima ntana.

²Mwolezi shuti aγaluke muntu mwena kilonga kitana mwena mvyele muṅwe du, mwena ukuwi na viyuγo na utanda na kishe, mwedahafuza, ashiye mnywezi,

³ashinaye lushuγushu, mwena uhozu, mweivana na weyae, ashiyekundisha mali,

⁴mwetaila kuγolokela nyumba yakwe vitana, mwena wana weitika na shima yoshe.

⁵Hambu muntu akishetaila kuγolokela nyumba yakwe ṅwenye, lushe atadaha zeze kukuya bumbangwa ja Mulungu?

⁶Muntu abatizweye viya lushe, asheγaluke mwolezi, kangwe ashezahikuka, hambu ne ndivyo akigele masa kwa yuja ṅwenye leba.

⁷Aagiziγwa ni ntogolo ntana kwa waja we se, kangwe ashedahiγwe akishungwa vibada, hambu ne ndivyo yuja ṅwenye leba amteγele navyo.

⁸Vivyoho hata watumikizi waγaluke wantu wegimbikwa, washilongawo masha maili, washiwotamilwa ni mpombe nyingi,

⁹washinawo mimotele mibada ya mali, weγolokela na myoyo yeṅala icho kihili, wachotozesha.

¹⁰Awa waneolelwa! Wakizatailikana kuti: Ni wantu wedi, newainkwe ndima ya kutumikila.

¹¹Vivyoho hata wavyele vyewaagiza shivi: Washimilwa, nkawana leba, wana ukuwi, watailikana mwe mbuli zoshe kuti: Niwakoolezi.

¹²Hata watumikizi shuti watende waγoshi wena mvyele muṅwe du, wetaila kuγolokela wana na nyumba zawe vitana!

¹³Hambu wetumikila vitana wamota fungu jedi na nyemi nyingi kwa viya, wavyomtozesha Kilisito Yesu.

¹⁴Ivi navikugondela, kangi naaliia, nifikeiza na kwako.

¹⁵Miya ati nakawa, kangwe utaile myangile yeagiza mwe nyumba ya Mulungu, ni bumba ja Mulungu mwe moyo, iji ne shikizi jegela viya vye kweli nguvu.

¹⁶Woshe waivana kuγamba: Kihili kikulu cha waja wemwitika Mulungu shichi: kuna alawileye mwe ṅwili wa kimuntu, azalesiγwa kuti aha mpeho, kuti ni mtanda, azalawila walau, azahilikilwa kwa wamzimu, azaona wemtozesha kunu shi, azainulwa na mwe utana wakwe.