Read Kishambala Tito 1 Bible Online

Tito 1 - Kishambala bible

Tito 1

¹Imi Paulo ni mtuṅwa ywa Mulungu, kangi ni ntuṅwa ya Yesu Kilisito, sa waja washaγulwewo ni Mulungu wavyotozesha kwa viya, wavyotaila vye kweli;

²vyeleka, wamwitika Mulungu na kualila nkalamo ya kale na kale, hambu ne msuhi, Mulungu ashihenyaye atiikilewo mishi ya kale ṅwenye,

³miya mishi ikitimiza, azalaviliza mbuli yakwe mwe uja ulau, nigimbikilwewo mubilikizi kwa mulomo wa Mulungu mwetihonya.

⁴Nakugondela iwe Tito baluwa, hambu u ṅwanangu ṅwenye, kuti mitozesheze yangu na yako ni miṅwe. Mbazi ikuikaile na utungu na mpeho yeanduka kwa Mulungu Tate na kwa mhonya ywetu Yesu Kilisito!

⁵Ne vilekilevyo, nikikuasha uko Kaleta, kangwe ubontoleze utanda ushiγalewo ukigimbikila mizi yoshe waγolokezi, sa ndivyo nikikulaγiliza:

⁶Ati muna muntu mwena kilango kitana, mwena mvyele muṅwe, mwena wana we kweli washiwoshingwa mumpa, washiwo wapapala.

⁷Mwolezi shuti aγaluke muntu mwena kilango kitana, hambu ni mfuṅwa ywa Mulungu; ashetende utungulu na nkunguka na unywezi na nkumbizi na milimo mibada,

⁸shuti atende kishe na utana na viyuγo na utanda na uṅazi, avote kihelehele,

⁹aγolokele mbuli za mtozesho tifuziγwezo, kangwe adahe kushangalaza wantu na mifuzize yeikaza, kangi adahe kubunkula wabishi.

¹⁰Hambu washiwoitika ni wangi, welonga mbuli za bule du, weazaγanya weyae wawe, weisiiza ivyoho ni waja washengiγwewo.

¹¹Awa vyaagiza kuwashitila vyanwa, hambu wachakula nyumba ngima wakihinya vishivyoagiza, kangwe waonele mali, unu ne mulimo wawe mubada.

¹²Ṅwiyae ywawe, mteγanyi ywawe ṅwenye, azalonga: Wakaleta watahenya du, ni mazama mabada, ni mafu mavizu.

¹³Unu uwona ni wa kweli. Kwa inu mbuli uwashunde na nguvu, kangwe wahone, watozeshe,

¹⁴washetongele ushimolezi wa Kiyuda na milaγilizo ya wantu wetowa hulu viya vye kweli!

¹⁵Weṅala myoyo vyoshe vyawaṅaila; miya wena myoyo mibada, washiwotozesha nkahana vyewaṅaila hata, hambu ntongonyezi zawe na myoyo yawe ni mibada.

¹⁶Na vyanwa walonga kuti: Tamtaila Mulungu, miya na miγoshwele yawe wamwikila nkani; wabuza useli, wapapalika, kila ndima ntana nkawaidaha.