Read Kishambala Waebuleyo 10 Bible Online

Waebuleyo 10 - Kishambala bible

Waebuleyo 10

¹Mulomongwa ufanana, viya ni kizuli cha viya vitana, ndivyo vilawile, kangi viya ṅwenyeṅwenye siwo, utafanana du navyo; ṅombe za mviko, wazokaiγala kila vuli, ni zizo kale na kale, kangi nkazidaha kuzifya waja weiza nazo.

²Waja wetimila miviko aho wakibinda kuhoziγwa kaṅwe, ati nkawataila, kuti ni wahuza vivyoho, anga nkawalekile kuiγala ṅombe za mviko?

³Miya kwa izi ṅombe kila vuli wakumbushiγwa uhuza wawe,

⁴hambu mpome ya nkambaku na ya fulata nkaidaha kuusha uhuza.

⁵Ne vyeleka, akilonga aho akiingila mwe inu shi: Ṅombe na nkande za mviko na matemo nkukundile, miya uzaninka ṅwili.

⁶Ṅombe zeokwa ngima na mpoza nkutamilwe ndizo,

⁷ne nihoγamba: Shimi naiza! Mbuli zangu ziigondiγwe mwe baluwangwa za kale, niγoshole kikundile chako, Mulungu.

⁸Kuandiila aγamba: Ṅombe na nkande za mviko na ṅombe zeokwa ngima na mpoza nkuzikundile, nkutamilwe ndizo; kangi ziteiγalwa kwa mulomongwa.

⁹Akibinda aγamba: Shimi naiza, niγoshole kikundile chako! Mbuli ya bosi aiusha, adaheshimika ija ya mbili.

¹⁰Kwa kikundile ichi tizabinda kuṅazwa kamkaṅwe, aho ṅwili wa Kilisito Yesu ukiinkilwa.

¹¹Kila mvikizi aγoloka mushi kwa mushi akibinda mviko, kangi ṅombe za mviko, azoiγala kangi muno, ni zizo zishizodaha hata kuusha uhuza.

¹²Miya uyu azaiγala ṅombe ṅwenga du ya mviko kwa mbuli ya uhuza wa wantu, kangi iyo ni ya kale na kale; akibinda azahita kwa ikala kulume kwa Mulungu.

¹³Lushe aafiza du, wankulu wakwe waikwe shi he milundi yakwe.

¹⁴Hambu na ija ṅombe yakwe ṅwenga ya mviko azabinda kuzifya kale na kale weṅaziγwa.

¹⁵Hambu hata Mpeho mṅazi atilongela uwona, hambu bosi aγamba: Shichi kilaγa, ndicho niwaikile, mishi ija ikibontoka; vikibinda Zumbe aγamba: Kangwe ni Zumbe:

¹⁶Naika mulomo wangu mwe myoyo yawe, naugonda mwe ntongonyezi zawe;

¹⁷sezenikumbuke uhuza na upapala wawe.

¹⁸Kangi unu uhoushiγwa, ne nkakuna lushe vituhu ṅombe za mviko kwa mbuli ya uhuza.

¹⁹Wanduγu, tiyaona nyemi lushe kuti: Taona sila yetiingiza haṅazi, ni mpome ya Yesu.

²⁰Inu sila ni ya mishi inu, yatinka nkalamo; azaititulila aho akiingila haṅazi ṅwenye, ni aho akikiinkila.

²¹Lushe tina mvikizi mkulu ywa nyumba ya Mulungu.

²²Netimtimile na myoyo ye kweli, yeisiiza kutozesha, ihoziγweyo na mpomengwa, kuti nkaitaila mbuli mbada vituhu, kangi mili iihakiγwe na mazi yeengemala.

²³Tikihime kutoza kialilo chetu ticholongela uwona vivyoho, tisheleke! Hambu yuja aviteγanyaye ni mkweli.

²⁴Kangi toshe tiolelane, ndivyo tiambizanye kukundishana na kuzifya ndimangwa,

²⁵tisheshwike miunganano yetu wenye, sa kuṅwe wavyozwela, miya tihimilane vivyoho, kangi tikazishe kwaviya, muvyoona kuti: Mushingwa wabula hehi!

²⁶Hambu ivyo, tivyotaila mbuli ya kweli, tikibana wenye na kutamilwa ndiko, nkakuna lushe luhozeze kwa mbuli ya uhuza,

²⁷kushiγala du kuzalahwa masa viwiwi na mabilibili ya moto weunga kubinda wankani.

²⁸Muntu akibana mulomo wa Mose akoṅwa kishimbazi kwa uwona wa wantu waili ao watatu.

²⁹Lushe muγamba ze? Muntu akimubela ṅwana Mulungu, akifanyanya mpome ya kilaγa, aṅaziγweyo nayo, kuti: Ni mbada, akikanka mpehongwa imhonyizeyo, uyu nkatazainkwa mlaho weiha kuzinka uja?

³⁰Hambu tamtaila, kuti azalonga; Mlahizo ni wangu, imi nitazawauziza. Vituhu aγamba: Zumbe atazalaha mbali yakwe.

³¹Vyagwiza woγa kukina mwe mikono ya Mulungu mwe moyo!

³²Fukilai mishi izinkileyo! Aho mkianda kulangazishiγwa mzazizimiza nkondo nyingi za kulumiziγwa.

³³Mishi kuṅwe wenye mwalaviγwa na lwazoi, mwakankwa, mwalumiziγwa, mishi kuṅwe mzaolela wenyu, wakiγoshwelwa ivyoho.

³⁴Waja washungiγwewo mzalumila haṅwe nawo, kangi mkihokwa viya muvyona navyo, mzavizizimiza na kutamilwa, hambu mzataila, muna kitende chelama kuzinka chiya, chishichobanika.

³⁵Msheashe kialilo chenyu chena upokezi ukulu!

³⁶Mwaagiziγwa ni uzizimizi, mγoshole viya, Mulungu avyokunda, mdahebontola kikundile cha Mulungu, kangwe nezemwonele viya, mulongiγwevyo.

³⁷Hambu kukeshiγala hadashi ṅwenye, ne ndiho yuja mtakuiza nezealawile, nkeakise.

³⁸Kangi mtanda atazatenda nkalamo na kutozesha kwakwe, miya muntu akiuya na nyuma, moyo wangu nkautamilwa ndiye.

³⁹Miya ishwi siwo teuya na nyuma, tikihose, miya titozesha, kangwe tihonye myoyo yetu.