Read Kishambala Waebuleyo 3 Bible Online

Waebuleyo 3 - Kishambala bible

Waebuleyo 3

¹Kwa ivyoho, wanduγu waṅazi, mweitangwa haṅwe na imi na mwitango wa kilwingu, mtongonyezei Yesu, kuti ni ntuṅwa na mvikizi mkulu, tiyemtogola!

²Azamkoolela yuja amteγileye sa viyaho vya Mose na chengo chakwe choshe.

³Kangi uyu azafilwa mbazi na kuinkwa utana ukulu kuzinka uja wa Mose, kwa kuti yuja mtakuzenga agimbikwa kuzinka nyumba.

⁴Hambu kila nyumba izengwa ni muntu, miya mweteγa vyoshe ni Mulungu.

⁵Kweli Mose azakoolela na chengo chakwe choshe, kuti ni mupuna; ne avyolonga uwona wa viya, ndivyo vilongwe.

⁶Miya Kilisito azaitika viya ni ṅwenye nyumba, kuti ni ṅwanangwa. Kangi ishwi ti nyumba yakwe, ati tatozesha kweli mpaka bindilizo nyemi na ntogolo, tiyoalila.

⁷Ne mpeho mṅazi avyolonga: Lelo mkiiva kanwa chakwe,

⁸mshetoγeshe myoyo yenyu sa haja mkizanishwika uko mwe nyika uja mushi mkiγeziγwa!

⁹Aho wababa zenyu wazaniγeza, wanibunkule, ne wahoona miγoshwele yangu mavuli milongo mine.

¹⁰Ne vilekilevyo, iyo mbali ikikanikweza maya, nikiγamba: Kale na kale waazaγanyiγwa ni myoyo yawe, washetaile, sila zangu.

¹¹Kwa maya yangu nizakilisha kuγamba:

¹²Wakashetaingila kwe hemelo jangu! Wanduγu, olelai, kwenyu kusheoneke muntu mwena moyo mubada ushiwotozesha, weuka kwa Mulungu mwe moyo!

¹³Miya shundanai kila mushi, kuke inu mishi, kangwe kusheoneke muntu kwenyu mwezatoγeshiγwa moyo ni lufyo lwa uhuza!

¹⁴Hambu tizaγaluka weyae wa Kilisito, ntoγo titozeshe kialilo chetu cha kivoko, chishetiaγile mpaka bindilizo.

¹⁵Hakiγangwa: Lelo mkiiva kanwa chakwe, mshetoγeshe myoyo yenyu, sa haja mkizanishwika,

¹⁶waivilewo ndiwo wakimshuka ni wahi? So woshe walaviγwewo Egiputa ni Mose?

¹⁷Kangi ni wahi ndiwo wakimkweza maya mavuh milongo mine? So waja wabanilewo, ndiwo wakiashiziγwa vimba nyika?

¹⁸Akilishize kwa mbuli ya wahi kuγamba: Washezaingila kwe hemelo jakwe, ati siwo waja, ndiwo wakisheitika?

¹⁹Kangi taona, kuti nkawadahile kuingila kwa mbuli ya kushetozesha kwawe.