Read Kishambala Waebuleyo 4 Bible Online

Waebuleyo 4 - Kishambala bible

Waebuleyo 4

¹Lushe mishi inu, uwo msuhi wa kuzaingila kwe hemelo jakwe u hsho, tiingilwe ni woγa, kangwe kwenyu kusheoneke muntu mweγamba: Nizabinda kuukosa.

²Hambu hata ishwi tizabilikilwa sa waja; miya waja iyo mbuli, waivileyo, nkaiwahonyize, hambu waja waivilewo nkawaitozeshe.

³Hambu ishwi tetozesha ne ndiwo nezetiingile kwe hemelo jakwe, sa alongilevyo: Kwa maya yangu nizakilisha kuγamba: Wakashetaingila kwe hemelo jangu! Kangi ndima ziiteγiγwe, shi ishizati iumbiγwe.

⁴Hambu mbuli ya mushi wa mfungate azailonga kuγamba: Mushi wa mfungate Mulungu azahemela ndima zakwe zoshe.

⁵Kangi aha akiγamba: Wakashetaingila kwe hemelo jangu!,

⁶ivyoho vyamanyika kuti: Hana ndiwo nezewajiingile; miya waja waandiilewo kubilikilwa nkewajiingile kwa mbuli ya kushetozesha kwawe.

⁷Lushe mishi ikibinda kuzinka mingi, aika mushi mtuhu, ni unu wa lelo, akilonga na kanwa cha Dawidi, sa vilongiγwevyo ṅwande: Lelo mkiiva kanwa chakwe, mshetoγeshe myoyo yenyu!

⁸Ati Yosuwa azawaiγala kwe hemelo, anga nkalongile mushi mtuhu we nyuma.

⁹Ne vyeleka, tikiγamba: Mbali ya Mulungu ikeikilwe hemelo.

¹⁰Hambu muntu akibinda kuingila kwe hemelo jakwe, yohe ahemela ndima zakwe, sa Mulungu ndivyo akihemela ziya zakwe.

¹¹Lushe netikihime, tiingile kwe jiya hemelo, kangwe kusheoneke muntu mweazaγanyiγwa ni uwo msimo wa kusheitika!

¹²Hambu mbulingwa ya Mulungu i moyo, ina nguvu, yashenga kuzinka shime yena nyino mbili, kangi yaingilisha, shuti itanye moyo na mpeho, uzumo na mavuha, yabunkula fanyanyi na ntongonyezi za myoyo.

¹³Nkahana che moyo chishichobunkulwa ndiye; akiolela, vyoshe vi lushi, viya vitekizuia; mbuli ya uyu ne tiyolonga.

¹⁴Tina mvikizi mkulu akwezileye mwe lwingu, ni Yesu, ṅwana Mulungu, kwa ivyoho netitoze tivyolonga!

¹⁵Hambu nkatina mvikizi mkulu ashinaye mbazi na manyonge yetu, hambu yohe azaγeziγwa na mbuli zoshe sa ishwi, kuti nkabanile.

¹⁶Lushe netitimile kitingwa cha mbazi na nyemi, kangwe tionelwe utungu, tifilwe mbazi, ndiho uvunizi uezeutikombaγanye.