Read Kishambala Waebuleyo 5 Bible Online

Waebuleyo 5 - Kishambala bible

Waebuleyo 5

¹Hambu kila mvikizi mkulu mweγwiγwa kwa wantu agimbikwa kwa mbuli ya wantu, awabindile viya vya Mulungu, ahoze uhuza wawe na kumwiγaila Mulungu ṅombe za mviko, wantu wazolavya.

²Uyu adaha kuona ukiwa haṅwe na waja wehatumatuma na waja washitailawo, hambu yohena atoziγwa ni unyonge;

³kwa unu unyonge shuti ahoze uhuza wakwe ṅwenye vivyoho, sa avyokahoza uja wa wantu.

⁴Kangi nkahana mwekigimbika ṅwenye, miya ateitangwa ni Mulungu, sa ndivyo Aloni akiitangwa.

⁵Ivyoho hata Kilisito nkakigimbike ṅwenye, aγaluke mvikizi mkulu, miya ni yuja amlongileye: Iwe u ṅwanangu, imi nizakuvyala lelo.

⁶Kangi hatuhu aγamba: Iwe u mvikizi kale na kale, sa Melikisedeki ndivyo ai mvikizi.

⁷Mishi, ndiyo akiikala na ṅwili wa kimuntu, azamhembeleza, azamkemela na mikemele yena nguvu, azamlilila yuja mwedaha kumhonya mwe kifa, kangi azaiviγwa ndiye, azaushiγwa woγa.

⁸Kweli ne ai ṅwanangwa, miya mwe viya alumilevyo ne ahinilemo kuitika.

⁹Mbuli yakwe ikibontoka, lushe woshe wemwitika azawaγalukila chandusho cha uvunizi wekalama,

¹⁰aho akiitangwa ni Mulungu mvikizi mkulu mwe ivyoho, sa ndivyo Melikisedeki ai mvikizi.

¹¹Aha hana mbuli nyingi za kulonga zena ntoγo za kufumbula, kwa kuti mashikilo yenyu nkayana kinyanyi cha kuiva.

¹²Inywi vizamitala kale kufuza wenyu, miya lushe wenye mwaagiziγwa ni kufuziγwa vituhu mbuli za Mulungu za kuandiila, mwaagiziγwa vituhu ni mele, nkande ndala nkamzidaha.

¹³Hambu kila mweinkwa mele nkazati ataile mbulingwa ye utanda, hambu ake mnkebe.

¹⁴Miya nkande ndala ni za wantu wagima; hambu awa, kwa viya wavyokizweza, myoyo yawe izatenda kinyanyi cha kufikataila mbuli, ati ni ntana, ati ni mbada.