Read Kishambala Waebuleyo 8 Bible Online

Waebuleyo 8 - Kishambala bible

Waebuleyo 8

¹Miya mbuli yekula kuzinka ziya, tilongilezo, ni inu kuti: Tina mvikizi mkulu ahitileye kwa ikala kulume kwe kitingwa cha ukulu uko kwe lwingu,

²kangi ni mγolokezi ywa haṅazingwa na ywa hemangwa ja kweli, Zumbe akimilejo, so muntu ajikimileye.

³Hambu kila mvikizi mkulu agimbikwa, aiγale ṅombe za mviko na matulongwa; kwa ivyoho hata uyu aagiziγwa ni chiya, ndicho amwiγaile Mulungu.

⁴Ati a kunu shi, anga so mvikizi, kwa kuti kunu kuna weiγala matulongwa, sa wavyolaγiliziγwa.

⁵Awa watumikila viya vyefanana, viya ni kizuli cha viya vye mwe lwingu, sa Mose alaγilizevyo akiunga kuγoshola hemangwa; hambu azaγangwa: Olelesha, uγoshole vyoshe, sa ija fanyanyi ilivyo, ndiyo ukionyeshiγwa mwe mulima!

⁶Miya lushe uyu azagimbikwa kumzinka yuja, hambu kilaγa, achotiletela, chatama kuzinkachiya, kangi chiikilwe misuhi yetama kuzinka ija.

⁷Hambu ati chiya cha bosi ne chii kitana ṅwenye, anga nkahashindalondiγwa ha ikila kituhu.

⁸Kangi alonga na kuwashunda angwe: Kangwe ni Zumbe: Mishi yaiza, ne ndiho niwaikile wana Isilayeli na wana Yuda kilaγa kihya chishichofanana na chiya kilaγa,

⁹nawaikilacho wababa zawe uja mushi nikiwatoza mikono, niwalavye mwe shi ya Egiputa, hambu icho kilaγa wazachibana, nami nizawatowa hulu, ne Zumbe avyolonga.

¹⁰Kilaγa, ndicho niwaikile wana Isilayeli, mishi ikibontoka, shichi: Naika mulomo wangu mwe myoyo yawe, naugonda mwe ntongonyezi zawe, niwaγalukile Mulungu, waniγalukile mbali yangu.

¹¹Nkezewahinyane muntu na ṅwiyae, ao du mkulu na nduγuye kuγamba: Mtailei Zumbe! Hambu woshe watanitaila, wai wadodo, mpaka wakikula,

¹²hambu nezeniwaushilize masa yawe, sezenikumbuke uhuza wawe.

¹³Aho akiγamba kihya, ne azabinda kuγalusha chiya cha bosi kishakazu, kangi cheshakala, kwa kuti ni cha mishi mingi, ne chizabuza kubanika.