Read Kishambala Yakobo 1 Bible Online

Yakobo 1 - Kishambala bible

Yakobo 1

¹Imi Yakobo, mtuṅwa ywa Mulungu na ywa Zumbe Yesu Kilisito, naluγusha mbali kumi na mbili zeikala uγeni kwe shi ntuhu.

²Wanduγu, longai kuti: Ni nyemi du, mkiγezwa ni mbuli nyingi na nyingi!

³Tailai kuti: Mitozesheze yenyu ikibunkulwa ivyoho: Kuti ni ya kweli, yatenda uzizimizi.

⁴Kangi uzizimizi ne ndiwo ubontole ndima, kangwe mγaluke Wakilisito wagima washiwoshiγaza, washiwoashiγwa nyuma mwe mbuli zoshe.

⁵Ati kwenyu kuna mweshowa viyuγo, avilombeze kwa Mulungu mweviinka wantu woshe kwa mbazi na kushetenda kinyuma! Ne ndivyo avionele.

⁶Miya alombeze na kutozesha, ashekalakashe! Hambu mwekalakasha afanana na imbi ja bahali jeinulwa, jeasiγwa ni mpeho.

⁷Muntu mwe ivyoho ashefanyanye, kuti atazainkwa ni Zumbe!

⁸Hambu ni muntu mwetongonyeza haili, kangi ahitukahituka mwe sila zakwe zoshe.

⁹Miya ṅweshu mkiwa atogole ukulu wakwe, kangi mzuli atogole ukiwa wakwe,

¹⁰kwa kuti atazabanika sa luwa ja tunduwi.

¹¹Zuwa jikicha, jikiaka na nguvu, janyulusha matundu, lushe luwa jitagwa, utana wa shula yakwe utabanika, vivyoho hata mzuli atazanyulukila mwe ntambo zakwe.

¹²Mwe nyemi ni muntu mwezizimiza akiγezwa, hambu akihiuda kuvola atazainkwa linga ja nkalamo, Zumbe ajoikila waja wemkundisha.

¹³Muntu akiγezwa ashelonge kuti: Mulungu ne mweniγeza! Hambu Mulungu nkaγezwa ni vibada, kangi ṅwenye nkaγeza muntu.

¹⁴Miya kila muntu aγezwa akihimilwa, akiheheleziγwa ni luzisho lwakwe ṅwenye.

¹⁵Hambu luzisho lukihimba luvyala uhuza, kangi uhuza ukibontoka uvyala kifa.

¹⁶Msheleke, mkiazaγanyiγwa, wanduγu wangu, niwokundisha!

¹⁷Vitana vyoshe na mbazi zoshe za kweli zianduka ulanga, zilawa kwa Tate mwe langaila, ashiyeγalamuka, kangi kwakwe langaila oa lwiza nkavihokelana.

¹⁸Kwa viya akundilevyo, azativyala na mbuli yakwe ye kweli, kangwe tiγaluke milimbulo ya vyumbo vyakwe.

¹⁹Ne muvyotaila wanduγu, niwokundisha. Kila muntu atende unyanyi wa kuiva, miya atende uzuzu wa kulonga na uzuzu wa kuγuiva maya!

²⁰Hambu maya ya muntu nkayaγoshola vyemtamila Mulungu.

²¹Kwa ivyoho ushai kwenyu vyoshe vye shoni na ubada woshe weγenela kwenyu! Hokelai na uhozu mbulingwa ihandiγweyo kwenyu! Hambu ne yedaha kuhonya myoyo yenyu.

²²Γosholai mbulingwa, mshefe kuiva du! Hambu ne wenye muvyokiufya navyo;

²³hambu muntu akifa kuiva du mbulingwa akisheiγoshola, afanana na muntu mweolela, cheni chakwe chilivyo mwe kilolo,

²⁴akibinda kukiolela ahita, afikajala, ndivyo ailivyo.

²⁵Miya mweolelesha, mulomongwa uvyotibontokela aho, tikiombolwa, mwevitozesha nkafa kuiva na kufikajala, miya aγoshola lushe ndimangwa; uyu aona nyemi na ija miγoshwele yakwe.

²⁶Muntu akikifanyanyiza, kuti amtumikila Mulungu, miya nkavota lulimi lwakwe, kangi aufya moyo wakwe, uyu mivikile yakwe ni ya bule.

²⁷Mivikile milana Ishiyobanika, yemtamila Mulungu Tate shinu: Kukaula wana waashiγwewo oi wavyazi wawe na wavyele wafilwewo ni walume wawe na kushekigela mwe usaba wa kiinushi.