Read Kishambala Yakobo 2 Bible Online

Yakobo 2 - Kishambala bible

Yakobo 2

¹Wanduγu wangu, msheγambe: Kumtozesha Yesu Kilisito, Zumbe ywetu mwe utana, kuivana na kuolela wantu!

²Hambu muja, mulimo, mukiingila muntu mwena mpete za zahabu kwe vyala vyakwe, azwikileye shuke ntana, kangi mukiingila mkiwa azwikileye shuke zekandana,

³lushe mkimwolela yuja mwena ziya shuke ntana, mkiγamba: Iwe ikala aha hatana!, miya yuja mkiwa mkimγamba: Iwe γoloka uko ao ikala shi he milundi yangu!,

⁴ivyoho myoyo yenyu nkaibunkuke? Mkipanga ivyoho nkamtatongela ntongonyezi mbada?

⁵Teγelezai, wanduγu wangu, niwokundisha! Waja wakiwa kunu shi Mulungu nkawazangile, waγaluke wazuli na kutozesha kwawe, kangi wapale uzumbe, awokunda kuinka waja wemkundisha? Miya inywi mzamubela mkiwa.

⁶Wazuli siwo wemitunguluka, wekamihuna na bomani?

⁷Siwo wekanka ijo zina tana, mujoitangwa najo?

⁸Miya mulomo mkulu wa Zumbe wa kuγamba: Umkundishe ṅwiyawo, sa uvyokikundisha ṅwenye!, mkiubontola unu, sa uvyogondwa, ne mtazifya.

⁹Miya mkiolela wantu mwabana, mwavotwa ni unu mulomo kuti: Mu wabani.

¹⁰Hambu muntu ati atozesha mulomo woshe akibana unu muṅwe du, azabinda kubana yoshe.

¹¹Hambu yuja alongileye: Ushetende kilanga!, ne alongileye: Ushekome! Lushe ati washetenda kilanga, miya wakoma muntu, ne uzabinda kubana mulomongwa.

¹²Longai, kangi γosholai sa wantu weunga kulahwa namulomo, wawokombolwanawo!

¹³Hambu ashitendileye mbazi atazaona masa yeshowa mbazi, kangi mbazi zatogolwa kuzinka ukali wa masa.

¹⁴Wanduγu wangu, ati muntu aγamba: Natozesha, miya ndimangwa aγosholezo nkana, atazaonela mbwai? Lushe kutozesha kwakwe nkekudahe kumhonya.

¹⁵Ati mwe nduγu yetu muna mγoshi ao mvyele mwekosa shuke ao nkande za kila mushi zemwagiza,

¹⁶lushe kwenyu kukioneka mwewaγamba: Hitai mpeho! Otelai moto! Iγutai wenye!, miya nkamuwainka viya vya mili vyewaagiza, ni mbazi ani?

¹⁷Vivyoho ukitozesha, miya nkuna ndimangwa, uyoγoshola, kutozesha kwako kuzabinda kuhanika.

¹⁸Hangi kuna mweγamba: Imi natozesha, iwe waγoshola ndimangwa; lushe nionyesha, uvyotozesha na kusheγoshola ndimangwa! Vikibinda nami nitakuonyesha, miγoshwele yangu ivyobontoka na kutozesha.

¹⁹Basi iwe watozesha kuti: Mulungu ni muṅwe; ni vitana; wakina Satani wohe watozesha ivyoho, kangi waukwa ni vizingizo.

²⁰Iwe muntu wehikuka, wakunda kutaila kuti: Kutozesha ni bule du, ukisheγoshola ndimangwa?

²¹Abulahamu, tate yweshu, nkainkiγwe utanda na kuγoshola ndimangwa haja, akizamkweza ṅwanae Isaka na mwe okelo ja ṅombe ya mviko?

²²Lushe wadahaona kuti: Kutozesha na kuγoshola ndimangwa kwaambizanya, kangi kutozesha kwakwe kuzabontoka na kuja kuγoshola ndimangwa;

²³ne kuvyobontoka uja ugonde wa kuγamba: Abulahamu azamtozesha Mulungu, ne vizamtalilwa utanda, ne azaitangwa mbuyae ja Mulungu.

²⁴Mwaona kuti: Muntu ainkwa utanda kwa kuγoshola ndimangwa, siko kwa kutozesha ike.

²⁵Vivyoho yuja Lahabu ne ai mvyele mhuza, miya nkainkiγwe utanda na kuγoshola ndimangwa haja akifikiza walaungwa, kangi akiwalavya kaya na kuwagwiza sila ntuhu?

²⁶Sa ṅwili ushiwohema uvyo kimba, vivyoho hata kutozesha kushikobontoka na kuγoshola ndimangwa ni kimba.