Read Kishambala 1. Petelo 3 Bible Online

1. Petelo 3 - Kishambala bible

1. Petelo 3

¹Vivyoho hata wavyele shuti waitike waγoshi wawe! Hambu ati kuna washiwoitika mbulingwa, watazamotwa ni myangile ya wavyele, hata wakishebilikilwa,

²wakiona na mesho yawe, muvyozifya myangile yenyu kwa kuogoha.

³Luhambo lwawe lusheγaluke luja lweoniγwa, ati ni kuhembela vunga, ati ni kukihamba na zahabu, ati ni kuzwika shuke,

⁴miya luhambo lwawe luγaluke luja lwefishiγwa mwe moyo, lushilobanika, ni muntu mwena mpeho ya uhozu na ya mpolele; ne vyena kima kwa Mulungu.

⁵Hambu hata kale wavyele waṅazi, ndiwo wakimwalila Mulungu, wazakihamba ivyoho, kangi wazaitika waγoshi wawe,

⁶sa Sala amwitikavyo Abulahamu akimwitanga zumbe; ati inywi wavyele mwazifya mbuli zenyu na kusheogoha vyegwiza woγa, ne mzaγaluka wanae.

⁷Vivyoho hata inywi waγoshi, angilanai nawavyele naviyuγoi Washimilei, kwa kuti wavyele ni vyumbo vinyonge, kangi wohena watazapala haṅwe na inywi mbazi ya nkalamo; tendai ivyoho, kangwe mshefingiziγwe kuvika!

⁸Vikibinda nyosheni tendai ntongonyezi ṅwenga, mulumile haṅwe, mkundishane na kufilana mbazi na kutumikilana!

⁹Vibada msheviuzize vibada! Lukanko msheluuzize na lukanko! Miya ṅazai mesho, kwa kuti mzaitangwa, mupale mṅazo wa mesho!

¹⁰Hambu mwekunda kuikala ugima, mwekunda kuona mishi mitana, anyamaze lulimi lwakwe, lushelonge vibada, kangina milomo, ishelonge mambeza!

¹¹Viya vibada shuti avibahuke, azifye mbuli, alonde mpolele, aitimile!

¹²Hambu mesho ya Zumbe yaolela watanda, mashikilo yakwe yaiva milombezeze yawe, miya cheni cha Zumbe chawaikila nkani waja weγoshola vibada.

¹³Kangi kuna ndiye adahe kumihosa, ati mwakihima kuzifya?

¹⁴Miya ati mwalumila kwa mbuli ya utanda, hata vivyo nyemi muna nayo; msheingilwe ni woγa na waja, msheazaγanyiγwe ni ivyoho!

¹⁵Mgimbikei Kilisito Zumbe mwe myoyo yenyu! Kiteγei hosheni mdahemlandula na uhozu na woγa kila mwemiuza kwa mbuli ya kialilo chenyu, muchona nacho!

¹⁶Msheikale na myoyo mibada! Hambu na viya muvyoshingwa kuti: Mu wahambanyi, watazabunkuka waja wemieza, kwa kuti mwatenda myangile mitana ya Kikilisito.

¹⁷Hambu ati Mulungu aakukunda, lushe kuja kulumila kwa mbuli ya kuzifya ni vitana kuzinka sho, ukilumila kwa mbuli ya kubana.

¹⁸Hambu Kilisito yohena azalumiziγwa kaṅwe kwa mbuli ya uhuza wetu, mtanda kwa mbuli ya wahuza, kangwe atiiγale kwa Mulungu; azakoṅwa kiṅwili, miya azafufuka kimpeho.

¹⁹Ne shitilevyo kwa hilikila wazimu uko, wakoshungilwa, ndiwo washiitikawo haja,

²⁰Mulungu akiwaafiza na kuzizimiza mishi ija ya Nowa, hakigombekeziγwa chiya kihweta; kangi haja waγeke du, wantu mnane du, wazahonela mumo mwe iyo nkondo ya mazi.

²¹Aya mazi yafanana, viya ni mazi ya ubatizi, yatihonya mishi inu, tikibatizwa nayo, so kwa kuγamba: Yausha nongo ya ṅwili, miya ni aho tikidaha kumlanga Mulungu na moyo ukombolwewo vitana kwa mbuli ya ufufuki wa Yesu Kilisito.

²²Hambu uyu ahitilevyo mwe lwingu kulume kwa Mulungu, aitikwa ni walan na ufuṅwa na nguvu zoshe.