Read Kishambala 2. Petelo 1 Bible Online

2. Petelo 1 - Kishambala bible

2. Petelo 1

¹Imi Simoni Petelo, mtuṅwa na ntuṅwaya Yesu Kilisito, namigondela baluwa inywi mwetozesha haṅwe na ishwi viya vikulu, tivyoinkwa kwa mbuli ya utanda wa Mulungu ywetu na mhonya Yesu Kilisito:

²Mbazi na mpolele ziγenyeziγwe kwenyu aho mkimtaila Mulungu na Zumbe ywetu Yesu Kilisito!

³Vyoshe vya nguvu yakwe ya Kimulungu vyeleka wantu waone nkalamo na nyemi ya Kimulungu, tizafilwa mbazi navyo aho tikimtaila yuja, ndiye akitiitangila uṅazi na utana wakwe ṅwenye.

⁴Vikibinda tizainkwa misuhi mikulu muno yena kima, kangwe nezemγaluke sa viyaho, Mulungu alivyo, mkinyilika kuja kubanika kweanduka mwe uhalami wa kiinushi.

⁵Kwa ivyoho kihimei kwa nguvu zoshe, mitozesheze yenyu izifye myangile, inu myangile mitana iminke utalizi!

⁶Unu utalizi uleke, mkivote wenye, kunu kuvoteka kuleke, mzizimize, unu uzizimizi uminke nyemi ya Kimulungu,

⁷inu nyemi ya Kimulungu ileke, mkundishane, kunu kukundishana kuleke, mkundishe wantu woshe!

⁸Ati ivi vyoshe muna navyo, kangi vikiγenda vikiγenela vivyoho, nkevileke, mkitenda uvizu ao mkishowa kuwo jeanduka mwe kuja kumtaila Zumbe ywetu Yesu Kilisito.

⁹Hambu yuja ashinaye navyo azabinda kufamesho, nkaona, azajala, kuti azaushiliziγwa uhuza wakwe wa kale.

¹⁰Kwa ivyoho, wanduγu, isiizai kukihima, kangwe viya mṅvyoitangilwa, muvyoshaγwilwa vishemiaγile! Hambu mkiviγoshola nkezemkungwale silai.

¹¹Hambu ne ndivyo mufilwe mbazi, mdaheingila kizumbe mwe uzumbe wa ukalami wa Zumbe na mhonya ywetu Yesu Kilisito.

¹²Kwa ivyoho nitamikumbusha mishi yoshe izi mbuli, hata mwizitaile, hata mwitendile nguvu na ivi vye kweli.

¹³Hambu naγamba: Nike mumu mwe iji hema, vyanitala kumigonya mesho na kumikumbusha izi mbuli,

¹⁴hambu nataila kuti: Mushi u hehi, ndiwo niashize iji hema, sa Zumbe ywetu Yesu Kilisito avyonifumbwila ṅwenye.

¹⁵Miya nitakihima, kangwe nibindileho kuuka kunu shi, inywi mzifukile izi mbuli mishi yoshe.

¹⁶Hambu ishwi nkatitongela ushimolezi, wantu wawohemba kuuteγa, miya titemionyesha, nguvu ya Zumbe ywetu Yesu Kilisito na miuyiye yakwe ilivyo, kangi ishwi tizaγaluka waona wa uja ufuṅwa.

¹⁷Hambu azashimilwa, azagimbikwa ni ishe Mulungu haja, akizalawila ni ichi kanwa chilawilecho kwe uja uṅazi ukulu muno cha kuγamba: Ṅwanangu niyemkundisha ni uyu, ne mwenitamila:

¹⁸Kangi ishwi te haṅwe naye mwe uja mulima mṅazi tizaiva ichi kanwa chilawilecho mwe lwingu.

¹⁹Kwa ivyoho taisiiza kutozesha mbulingwa ya uteγanyi, hata inywi vyamiagiza kuanga nayo, hambu ni langaila jamulikila bantu he lwiza, mpaka ndiho kuche, mpaka ndiho mtakumulika amilawile mwe myoyo yenyu.

²⁰Miya bosi tailai kuti: Kila uteγanyi wa ugondengwa nkauhafumbulikana! Hambu nkahana

²¹uteγanyingwa weanduka kwa kikundile cha muntu, miya wantu wa Mulungu wazaulonga wakihimilwa ni mpeho ṅazi.