Read Kishambala 2. Petelo 2 Bible Online

2. Petelo 2 - Kishambala bible

2. Petelo 2

¹Kangi ne mwina wabilikizi wa ulongo mwe mbalingwa, vivyoho hata kwenyu wafuzi wa ulongo watazaoneka, awa wataingiza kinjama mihinyize yehosa, kangi yuja Zumbe awakombolaye wamwikila nkani, ne wavyokihosa wenye, wafikebanika.

²Kangi wangi watazatongela uhambanyi wawe, ne ndiwo waleke, sila ye kweli ibeleshiγwe.

³Kwa luzisho lwawe lwa mali watazamichuluza, miya mlaho wawe hata kale nkaukisa, kubanika kwawe nkakukawa.

⁴Hambu hata walau wabanilewo Mulungu nkatendile mbazi nawo, miya azawashindika kuzimu, waishungiγwe na mazolo ya lwiza, azawainkila, waikilwe mushi wa masa.

⁵Hata shi ya kale nkatendile mbazi nayo, miya iyo shi ya wapapala azaibana na ungi wa mazi, azamhonya Nowa na weyae mfungate, hambu ne akibilikila ntanda wakwe.

⁶Hata mizi ya Sodoma na Gomola azailaha, azaibinda na kuiokela; ne kutionyesha, milaho ya waja ndiwo wamupapalike ilivyo.

⁷Miya Loti azamvunila, hambu ne ai mtanda, ne akija sungu kwa mbuli ya waja washeiva, wakiisiiza kuhemba, hambu uyu mtanda,

⁸kwa kuti azaikala haṅwe nawo, mushi kwa mushi azaona, kangi azaiva mbuli zawe mbiwi, Lvi vizamlumiza mwe moyo, kwa kuti ni mtanda.

⁹Miya wemwogoha, Zumbe ataila kuwavunila mwe miγezo, kangi wawiwi awaika, walahwe mushi wa masa.

¹⁰Ndiwo waisiiziγwe ni waja wetongela mili miγeni na kihelehele cha kubana nayo, ne webela ufuṅwa, washeiva, watungulu, washinawo woγa na kukanka vye utana.

¹¹Kangi walau wewazinka nguvu na ukulu wana woγa kuwafyalima kwa Zumbe na kuwakanka.

¹²Miya awa wafanana na nyama zishinazo lutwi, hambu izi zihavyala du, mbuli yawe ni kugwilwa na kubanika. Vivyoho hata waja kwa viya wavyobela viya, washivyotaila, watazabanika kwa mbuli zawe za kubana, watazamota upokezi wa usheiva wawe.

¹³Waitanga: Ni nyemi kuhakijiila kila mushi vitana vya kiinushi, wafanana na madanko mabada, miya kwa lwufyo lwawe waja haṅwe na inywi nkande za mbazi kangi wajilisha.

¹⁴Mesho yawe yaimemile utesi, nkawadila kubana, wahosa waja washiwotozesha vyedi, myoyo yawe iitaile mizungu yoshe ya kuonela mali, ni wanangwa wa kilano.

¹⁵Wazaasha sila yeγolokela, ne wazaaγa, wazatongek sila ya Bileyamu, ṅwana Beyoli, uyu azakundisha mali yeanduka kubada, miya azashundwa kwa mbuli ya unu upapala wakwe:

¹⁶Mpunda ishiyolonga izamlonga na kanwa cha kimuntu, ne ifingizevyo udashi wa yuja mteγanyi.

¹⁷Awa ni mashoko yashinayo mazi, ni mazunde yehaasiγwa ni mpeho, lwiza ludala wailuikilwe.

¹⁸Walonga mbuli za mahiku du zishinazo bontokelo, na uhalami na upepe na uhambanyi wawe wahosa waja waandiilewo kunyilika waja weanga na kuaγilwa,

¹⁹wawaluvya na kuγamba: Tiikombolwe, kangi wenye ni wapuna wa viya vyekoma, hambu mbuli, muntu ayovotwa ndiyo, ne azaiγalukila mtuṅwa.

²⁰Aho waandiileho kumtaila Zumbe, mhonya Yesu Kilisito, wazanyilika viya viwiwi vya inu shi, miya kunu nyuma wakitoziγwa vituhu ndivyo, kangi wakivotwa, ivi vya nyuma vizaisiiza vibada kuzinka viya vya bosi.

²¹Ati nkawataile sila ya utanda, anga ni vitana; miya wakibinda kuitaila, lushe wakitowa hulu mlaγilizo mṅazi, tiinkiγwewo, ni viwiwi.

²²Lushe vyawe ni viya vya kweli vya lushimo lwa kuγamba: Kuli jija matahika yakwe ṅwenye, na luja lutuhu: Nguluwe ikihakwa mazi itimila mabulu yakwe, ikihake nayo.