Read Kishambala Mfumbulo 15 Bible Online

Mfumbulo 15 - Kishambala bible

Mfumbulo 15

¹Nizaona kilozo kituhu mwe lwingu, kikulu icho chemasha, ni walau mfungate watozizewo milaho mfungate ya shilikiza; hambu ne maya ya Mulungu yamobontokela.

²Nizaona, viya ni bahali ya kilolo yevanganavangana na moto; waja wavotilewo mwe nkondo ya ija nyama na ya kinyuwa chakwe na ya talo ja zina jakwe waiγoloke mwe inu bahali ya kilolo ulanga, waitozize mapango ya Mulungu.

³Waimba imbo ja Mose, ndiye ai mtuṅwa ywa Mulungu, na imbo ja yuja ṅwangoto angwe: Zumbe Mulungu, wena nguvu zoshe, miγoshwele yako ni mikulu, yamasha, sila zako ni za utanda na za kweli, iwe Zumbe ywa wamzimu.

⁴Kuna ndiye ashekuogohe, Zumbe? Kuna ndiye ashegimbike zina jako? Hambu u mṅazi ike, wamzimu woshe nezewaize, nezewakuvike na kukukinila, kwa kuti milabile yako izalawila.

⁵Vikibinda nizaona kuti: Vikilo ja hema ja uwona uko kwe lwingu jizazuγulwa,

⁶mzalawa muja vikiloi waja walau mfungate watozizewo ija milaho mfungate, waizwikile shuke zeṅala, kangi zenamanika, kwe vifuwa waikantile mikowa ya zahabu.

⁷Ziya nyama ne ṅwiyae ywawe muṅwe azawainka waja walau mfungate ntungo mfungate za zahabu zimemilezo maya ya Mulungu mwekalama kale na kale.

⁸Ne vikilo jihomema moshi welawa mwe utana na mwe nguvu ya Mulungu, nkahana adahileye kuingila vikiloi, mpaka ija milaho mfungate ya waja walau mfungate ikibontoka.