Read Kishambala Mfumbulo 2 Bible Online

Mfumbulo 2 - Kishambala bible

Mfumbulo 2

¹Mlau ywa bumbangwa ja Efeso umgondele kuγamba: Ne avyolonga mwetoza ziya ntondwe mfungate na mkono wakwe wa kulume, mweanga gati mwe ziya taa mfungate:

²Nataila miγoshwele yako na lulali na uzizimizi wako; nataila, kuti nkuivana na wawiwi, uzawaγeza waja weγamba, kuti ni ntuṅwa, kangi siwo, uzawabunkula kuti: Ni wa mambeza.

³Una uzizimizi, uzafa muku kwa mbuli ya zina jangu, kangi nkutibuke.

⁴Miya nakushunda, kuti uzaleka mikundishize yako ya kuandiila.

⁵Kumbuka lushe, ukinileho naho, uvoteke, uγoshole miγoshwele yako ya bosi! Miya ati una nkani, nenikuizile kinyanyi, nikinye taa yako, iuke hantu hakwe, ati washevoteka.

⁶Miya inu mbuli una nayo kuti: Nkukunda miγoshwele ya Wanikolayi, nishiyokunda nami.

⁷Mwena mashikilo aive, mpehongwa ivyolonga mabumbangwa! Ndiye avote, nezenimunke muti wa nkalamo uko Paladiso kwa Mulungu, auje.

⁸Mlau ywa bumbangwa ja Similina umgondele kuγamba: Ne avyolonga yuja ywa bosi na ywa shilikiza, afaye,

⁹kangi afufukaye: Nataila nkondo zako na ukiwa wako, kangi u mzuli; nataila, uvyokankwa ni waja wekiitanga Wayuda, kangi siwo; ni wahina wa Satani.

¹⁰Usheogohe viya, ndivyo ulumiziγwe! Kaula, yuja ṅwenye leba inywi kuṅwe neamigele mwe chumba, kangwe mγeziγwe, nezemwone ukiwa mishi kumi. Tozesha mpaka kufa! Ne ndivyo nikunke linga ja nkalamo.

¹¹Mwena mashikilo aive, mpehongwa ivyolonga mabumbangwa! Ndiye avote, nkezeatungulukwe ni kifa cha mbili.

¹²Mlau ywa bumbangwa ja Peligamo umgondele kuγamba: Ne avyolonga yuja mwetoza shime yekolesha,

¹³yena nyino mbili: Nataila miγoshwele na miikaile yako kuti: Uikala, kitingwa cha Satani chiliho, kangi watozesha zina jangu, nkukezile nkani, kuti wanitozesha, hata mishi ija, Antipa, mwona ywangu mwe kweli, akikoṅwa kwenyu, Satani akoikala.

¹⁴Nivyokushunda ni vidodo, kuti kwako una wetozesha mihinyize ya Bileyamu amhinyizeye Balaka kuihiza wana Isilayeli na kuja nyama za fika na kulenda kilanga.

¹⁵Ivyoho hata iwe una nawo wetozesha mihinyize ya Wanikolayi yefanana na ija.

¹⁶Lushe voteka! Miya ati una nkani, nenikuizile kinyanyi, niwaomanye na ija shime ya kanwa changu.

¹⁷Mwena mashikilo aive, mpehongwa ivyolonga mabumbangwa! Ndiye avote, nezenimupangile ija mana ifishiγweyo, nezenimunke nyanga yeṅala, kangi mwe iyo nyanga mwigondiγwe zina hya jishijotailwa ni muntu kushima yuja mwejiγuwa.

¹⁸Mlau ywa bumbangwa ja Tiyatila umgondele kuγamba: Ne avyolonga Ṅwanangwa ywa Mulungu, mwena mesho yakwe yefanana na bilibili ja moto, kangi milundi yakwe ifanana na ṅandu:

¹⁹Nataila ndima zako na mikundishize yako na mitozesheze yako na mitumikile yako na uzizimizi wako; kangi ndima zako za kushilikiza zaγenela kuzinka ziya za bosi.

²⁰Miya nakushunda, kuti wamleka du yuja mvyelengwa mweitangwa Izebeli, mwekiitanga mubilikizi, mweazaγanya wapuna wangu na kuwahinya kutenda kilanga na kuja nyama za fika.

²¹Nizamunka mishi, avoteke, kangi nkakunda kuvoteka, akileka kilanga chakwe.

²²Kaula, nezenimtambike mwe lusazi, kangi waja watendilewo kilanga naye nezeniwagele ukiwa ukulu, ati washevoteka na kutowa hulu izo ndima zawe.

²³Wanae neniwakome, wafe, mabumba yoshe yataile, kuti imi nabunkula fiγo na myoyo, kuti nezenimwuzize kila muntu, sa ndima zakwe zilivyo.

²⁴Miya namiti inywi watuhu uko Tiyatila, mushiwotongela ija mifuzize, mushiwotaila minyanyi yoshe ya Satani, namilonga kilushimo kuγamba: Sezenimiinuze mziγo wa mtuhu.

²⁵Komo muvyona navyo muvitoze, mpaka ndiho nezeniizile!

²⁶Ndiye avote, ndiye atongele miγoshwele yangu, nezenimunke ufuṅwa wa wamzimu,

²⁷awalishe na ngoda ya kilama, sa vyumbo vya mwufi vivyotulwa.

²⁸Sa ṅwenye niinkiγwevyo ni Tate, nezenimunke ntondwe ya mbalakele.

²⁹Mwena mashikilo aive, mpehongwa avyolonga mabumbangwa!