Read Kishambala Mfumbulo 20 Bible Online

Mfumbulo 20 - Kishambala bible

Mfumbulo 20

¹Nizaona mlau, akisheela mwe lwingu, aitozize mwe mkono wakwe funguwo ya kuzimu na zolo kulu muno.

²Azagwila jiya zoka, ni ija nyoka ya kale, ni ṅwenye leba, kangi ni Satani, azamshunga mavuli kulija,

³azamtambika na kuzimu, akibinda azakuzuγala, azakugela chapa ulanga, kangwe ashezaazaγanya wamzimu, mpaka yaja mavuli kulija yakibontoka; yakibinda kuhontoka, shuti aneshungulwa hadodo vituhu.

⁴Nizaona viti, kangi kuna weviikaila, awa wazainkwa ufuṅwa wa masa; mpeho za waja wakomiγwewo na kushengwa mitwi kwa mbuli ya kutozesha uwona wa Yesu na mbulingwa ya Mulungu, ndiwo wakishevika ija nyama na kinyuwa chakwe, ndiwo wakishekigela nyindi jakwe kwe vyeni na kwe mikono yawe, wazauya moyo lushe, wazatoza uzumbe haṅwe na Kilisito mavuli kulija.

⁵Waja wafilewo watuhu nkawauzile moyo, mpaka yaja mavuli kulija yakibontoka. Unu ni ufufuki wa bosi.

⁶Mwe nyemi, kangi mṅazi ni mweingila mwe unu ufufuki wa bosi. Awa kifa cha mbili nkachina ufuṅwa nawo, miya wataγaluka wavikizi wa Mulungu na wa Kilisito, watatoza uzumbe naye mavuli kulija.

⁷Aya mavuli kulija yakibontoka, Satani atashungulwa mwe chumba chakwe.

⁸Atahita kwa anga, aazaγanye wamzimu weikala kwe yaja maheta mane ya inu shi, waja wa Gogi na wa Magogi, awaunganyanye kwe nkondo; kangi newaγenele sa mshangalaγala we mpwai.

⁹Wazakwela na uko, shi ikoangalamuka, wazadenga malaγo ya waṅazi na uja muzi wekundishiγwa ndiwo; miya moto uzalawa mwe lwingu, uzasheela, uzawabinda.

¹⁰Yuja ṅwenye leba, ndiye akiwaazaγanya, azatambikwa na mwe jiya ziwa ja moto wa vihilitibiliti, ija nyama na yuja mubilikizi ywa ulongo walimo, wataswilimiziγwa haho kilo na mushi kale na kale.

¹¹Nizaona kiti kikulu cheṅala na yuja mwechiikaila; cheni chakwe chizanyilikwa ni shi na lwingu, nkazionelwe ha ikala.

¹²Vikibinda nizaona wafilewo, wakulu na wadodo, wakiγoloka he ichi kiti, ne vitabu vihokusulwa; kuna kitabu kituhu, chohe chizakusulwa, ni cha nkalamo. Waja wafilewo wazalahwa na viya, vigondiγwevyo mwe viya vitabu, sa ndivyo miγoshwele yawe ilivyo.

¹³Hata bahali izalavya waja wafilewo mumo, hata kifa na kuzimu kuzalavya wafilewo we muja, wazalahwa, kila sa miγoshwele yakwe ilivyo.

¹⁴Kifa na kuzimu wazatambikwa na muja mwe jiya ziwa ja moto, ichi ne kifa cha mbili, jiya ziwa ja moto.

¹⁵Ati muntu nkaoniγwe kuti: Aigondiγwe mwe chiya kitabu cha nkalamo, azatambikwa na mwe jiya ziwa ja moto.