Read Kishambala Mfumbulo 21 Bible Online

Mfumbulo 21 - Kishambala bible

Mfumbulo 21

¹Nizaona lwingu luhya na shi mpya; hambu lwingu lwa bosi na shi ya bosi ne zizabinda kuuka, hata bahali nkaiho lushe.

²Nizaona uja muzingwa mṅazi, uja wa Yelusalemu muhya, ukilawila mwe lwingu kwa Mulungu, ukisheela na shi, uihambiγwe, sa kilumbu chivyomhambilwa mγoshi ywakwe.

³Nizaiva kanwa kikulu chelawa he kitingwa, angwe: Shiji ikailo ja Mulungu na ja wantu, ndimo aikale nawo, ndimo waja waγaluke mbali zakwe, ndimo Mulungu ṅwenye aangilane nawo.

⁴Alazahonola meshozi yoshe he mesho yawe, kangi kifa nkechikeoneka mumo, hala ukiwa na kulila na kulumilwa nkezevikeoneka mumo, hambu viya vya bosi vizabinda kuuka.

⁵Yuja mweikaila chiya kitingwa azalonga angwe: Olela, vyoshe naviuza uhya! Azaniti: Gonda! Hambu izi mbuli zaagiza kutozeshiγwa, ni za kweli.

⁶Azaniti: Vizabontoka; imi ni A na O, ni kuγamba: Ni ywa andiila na ywa shilikiza. Mwena nkilu, imi nezenimtekele bule du mwe shoko ya mazi ya nkalamo.

⁷Ndiye avole, alazavipala vyoshe; imi nitazamγalukila Mulungu, yohe atazaniγalukila ṅwana.

⁸Miya ndiwo wakivivilwa, washitozeshawo, waγenyezawo vibada, wampoko, watesi, washai, wavika fika, wamambeza woshe, fungu jawe ji muja mwe jiya ziwa jeaka moto na vibilitibiliti, ni kuγamba: Ni kifa cha mbili.

⁹Waja walau watozizewo ziya ntungo mfungate zimemilezo ija milaho mfungate ya shilikiza, ṅwiyae ywawe muṅwe azaniγolokela, azanilonga angwe: So, nikuonyeshe mvyelengwa, kilumbu cha yuja ṅwangoto!

¹⁰Azaniiγala kimpeho na kwe mulima mkulu weleha na ulanga, azanionyesha uja muzingwa mṅazi wa Yelusalemu, ukisheela kwe lwingu kwa Mulungu.

¹¹Utana wakwe ni uja wa Mulungu; kumulika umulika, viya ni jiya iwe jena kima kuzinka weyae woshe, viya ni kazanga ka iwe jayasipi.

¹²Una boma kulu jeleha na nkili kumi na mbili, kangi kwe izi nkili ulanga kuna walau kumi na waili, vikibinda ziigondiγwe mazina, ni yaja ya ziya mbali kumi na mbili za wana Isilayeli.

¹³Lwazu lwelawa zuwa ni nkili ntatu, lwazu lweingila zuwa mishi ya nyota ni nkili ntatu, lwazu lwegwila zuwa mishi ya vuli ni nkili ntatu, lwazu lweingila zuwa ni nkili ntatu.

¹⁴Boma ja unu muzi jina mashikamilo kumi na maili, mwe aya mashikamilo muna mazina kumi na maili, ni ya ziya ntuṅwa kumi na mbili za ṅwangoto.

¹⁵Yuja ndiye akinilonga, aitozize ngoda ya zahabu ya himila, kangwe ahime uja muzi na nkili zakwe na boma jakwe.

¹⁶Uja muzi una maheta mane, ule wakwe na mazu waliγanana na uzangalamu wakwe. Akihima unu muzi na ngoda yakwe, ni ntampo makulija kumi na maili; ule wakwe na mazu na uzangalamu wakwe na ule wakwe na ulanga vyaliγanana.

¹⁷Azahima boma jakwe, ukihima kimuntu, sa yuja mlau ahimilevyo, ni mikono gana na milongo mine na mine.

¹⁸Iji boma jizengiγwe na mawe ya yasipi, muzi ṅwenye uzengiγwe na zahabu du yelangazika sa kilolo kitana.

¹⁹Yaja mashikamilo ya boma ja muzi yazahambiγwa na mawe mangi yena kima: Shikamilo ja bosi ni yasipi, ja mbili ni sapufilo, ja ntatu ni kakedoni,

²⁰ja ne ni sumalato, ja shano ni salidoniki, ja mtandatu ni salidiyo, ja mfungate ni kilisolito, ja mnane ni belilo, ja kenda ni topaziyo, ja kumi ni kisopulaso, ja kumi na ṅwenga ni hiyakinto, ja kumi na mbili ni ametisito.

²¹Ziya nkili kumi na mbili ni makalata kumi na maili, kila nkili ṅwenga ni ya kalata iṅwe. Lwazo lwa muzi ni zahabu ṅwenye yelangazika sa kilolo.

²²Vikilo siene mumo, hambu Zumbe Mulungu mwena nguvu zoshe ni vikilo jakwe haṅwe na yuja ṅwangoto.

²³Unu muzi nkauagiziγwa ni zuwa ao ṅwezi, vikiaka mumo, hambu utana wa Mulungu waupwinkula, taa yakwe ni yuja ṅwangoto.

²⁴Wamzimu nezewaangile jiya langaila jakwe, wazumbe wa shi nezewaingize vitana vyawe na mumo.

²⁵Nkili zakwe nkazizuγalwa na mushii, hambu kilo nkamuna.

²⁶Utana na uzuli wa wamzimu nezewaningize na mumo.

²⁷Miya nkezemwingile vibada hata, hata muntu mweγoshola vye useli na vye mambeza, ni waja wagondiγwewo mwe kitabu cha nkalamo cha yuja ṅwangoto.