Read Kishambala Mfumbulo 4 Bible Online

Mfumbulo 4 - Kishambala bible

Mfumbulo 4

¹Vikibinda nizaolela, nizaona luvi, luizuγuke mwe lwingu; kangi nizaiva kanwa cha bosi, niivilecho, viya ni cha gunda, chelonga na imi angwe: Kwela na aha, nikuonyeshe vyeunga kuγosholeka uko nyuma!

²Viya du lushe nizakwela kimpeho, nizaona kiti, chiikiγwe mwe lwingu; mwe ichi kiti muna achiikaileye.

³Uyu aikaleye ukimwolela, afanana na iwe ja yasipi ao ja salidiyo; vikibinda ichi kiti chiidenganilwe ni lunywa mazi, nikiluolela, lufanana na iwe ja sumalato.

⁴Vikibinda kuna viti milongo mili na vine videnganilevyo icho kitingwa, mwe ivi viti mwiikale waγolokezi milongo mili nawane, waizwikile shuke zeṅala, mwe mitwi yawe waizwikile mabunduya zahabu.

⁵He icho kitingwa hazamulika na kuγuγumuka na kubambaluka, kangi he icho kitingwa kamazu hadodo hana taa za moto mfungate zeaka, ne ziya mpeho mfungate za Mulungu.

⁶Vituhu kamazu he icho kitingwa hana, viya ni bahali ya kilolo yefanana na kilisitalo. Kangi he icho kiti gati haidenganile nyama ne, zigisizezo mesho mwe vyeni, hata nyuma.

⁷Nyama ya bosi ifanana na shimba, nyama ya mbili ifanana na ndama, nyama ya ntatu ina cheni, viya ni cha muntu, nyama ya ne ifanana na ngwilizi yepulika.

⁸Izi nyama ne zina mawawa mtandatutandatu, ziigisize mesho cha se na cha ndai; nkazihema, zalonga kilo na mushi: Mṅazi, mṅazi, mṅazi ni Zumbe Mulungu mwena nguvu zoshe, ndiye ai haho, mwe haha, ndiye aize.

⁹Kangi izi nyama ziyamgimbika na kumshimila na kumtogola yuja mweikaila kitingwa, mwe moyo kale na kale.

¹⁰Ne waja waγolokezi milongo mili na wane wahomkinila mweikaila kitingwa na kumvika yuja mwe moyo kale na kale; vikibinda wazaika malinga yawe shi he kitingwa angwe:

¹¹Iwe Zumbe na Mulungu ywetu, vyakuagiza kutogolwa na kushimilwa na kugimbikwa, kwa kuti iwe uzaumba vyoshe kwa kikundile chako, viya ukundilevyo vizalawila, vizaumbiγwa.