Read Kishambala Mfumbulo 8 Bible Online

Mfumbulo 8 - Kishambala bible

Mfumbulo 8

¹Akishungula gongezo ja wafu ja mfungate, uko kwe lwingu vyoshe vizatongomala hindi gima ja saa.

²Nizaona waja walau mfungate wemγolokela Mulungu, wakiinkwa magunda mfungate.

³Vikibinda kuzalawila mlau mtuhu, azaγolokela okelo ja ṅombe za mviko aitozize kitasa cha zahabu cha vunkiziza, azainkwa uvumba ungi, anoke, waṅazi woshe wakivika mwe okelo ja ṅombe za mviko je he kitingwa kamazu.

⁴Moshi wa uvumba uzakwela mwe mkono wa yuja mlau haṅwe na miviko ya waṅazi, uzabula ha Mulungu.

⁵Vikibinda yuja mlau azaγuwa chiya kitasa cha vunkiziza, azachimemeza moto weanduka mwe jiya okelo ja ṅombe za mviko, azachitambika na shi; ne kuholawila lubambala na lukuwa na lumuli na mdidimo.

⁶Waja walau mfungate watozizewo yaja magunda mfungate wazakiteγa lushe, watowe magunda.

⁷Mlau ywa bosi azatowa gunda, ne kuholawila fula ya mawe na moto, viivangane na mpome, vizagwa na shi; kuzahya fungu ja ntatu ja ngulu ngima, hata fungu ja ntatu ja miti jizahya, hata mani yoshe maishi yazahya.

⁸Mlau ywa mbili azatowa gunda, ne kuholambikwa na mwe bahali viya ni mulima mkulu weaka moto, fungu ja ntatu ja bahali jizaγaluka mpome,

⁹kangi fungu ja ntatu ja nyama za bahali ze moyo jizafa, hata fungu ja ntatu ja vyombo jizabanika.

¹⁰Mlau ywa ntatu azatowa gunda, ne kuholawa ntondwe nkulu mwe lwingu yeaka moto, viya ni taa, izagwa na mwe fungu ja ntatu ja mito na mwe mashoko ya mazi.

¹¹Inu ntondwe zina jakwe iitangwa Leza, fungu ja ntatu ja mazi jizaγaluka, viya ni leza, wantu wangi wazakoṅwa ni yaja mazi, kwa kuti yanyeγelesha.

¹²Mlau ywa ne azatowa gunda, ne kuhotowiγwa fungu ja ntatu ja zuwa na fungu ja ntatu ja ṅwezi na fungu ja ntatu ja ntondwe, aya mafungu yawe ya ntatu yazagwa lwiza, aya mafungu yawe nkayaakile mushii, hata kilo ni vivyoho.

¹³Nikikaula nizaiva, ngwilizi ikipulika mwe lwingu lwe gati, ikikema na kanwa kikulu angwe: Nkondo! Nkondo! Nkondo! Zitalawila weikala mwe shi, kukikema magunda yashiγaleyo ya waja walau watatu weunga kuyatowa.