Read Kissi O Kandɔɔ 11 Bible Online

O Kandɔɔ 11 - Kissi bible

O Kandɔɔ 11

¹Sɔɛi mangalɛi pilɛi kpé vanndacieea o ceendo coo kpow a va dimio ni, diomnda pilɛlan ndáà soaa ni.

²Mɛɛ nda faŋan a ba paalen le can-ndo, má va kɔlan, má komal dɛngbɛ bɛndu-bɛndoo pum o lɛŋnde Sinear len nin, má kila dɔ́ɔ́ngɔ́ɔ̀ lon.

³Má dimulan vellaa-velle aa: «Vannda sei! N tosan vali pilɛ. N lɔɔnun kpilikion mì n lomnun mun.» Má tosa vallo a kpilikin nda lom mún-ndon maa lapow, má tosa vɛlɛ vallo a puulu lindaa maa laso.

⁴Má dimulan vɛlɛ aa: «N tangulun kobio, mì n baŋnun cɛi coocoo, mì bolle ndɔlen le tiiya háá o halataala. N tosa pɛ lende, n pɛlnun ladio, handɔɔ o kon coo, n ve lɛnin a saŋnannda o lɛŋnden coo le.»

⁵Mí Mɛlɛka toal, mó hun mɛɛndan kobio a cɛi coocoo vanndacieea va tangullo-o.

⁶Mɛɛ o cii mɛɛndan, mó dimi aa: «Vanaa pilɛa vannda ha kpede a co ni, sɔɛi mangalɛi pilɛi kpé nda co dimio ni, taa kandu pɛ dɛnɛ vaa nuaa tosaa, le fɛɛn a fɛɛn nin, ɲɛ-ɲɛ nɔla lɛ mò kuuna nda ɲɛ nda tuu le tosaa-o tosa le.

⁷Lelan, n tolnun mì n kɔ laasian sɔɛi ndɛi mangalɛi, yɔŋii nda tuɛyan ladiom vellaa-velle.»

⁸Mí Mɛlɛka puusiaa nda lon, mó sɛŋi nda o lɛŋnden kpow coo, má mal tangul ndáà kandu kon-ndo.

⁹Le kɔlɔɔ ho nda ke fonda kon diolan ni aa Babɛl. Kani lon Mɛlɛka laasiaa sɔɛi mangalɛi vanndacieea ni, mó sɛŋi nda o lɛŋnden coo kpow.

¹⁰Diola vanpiaandua fula o polale Sɛm-nden nin-nda la co lan ni. Sɛm ndóò nɔ vɔsilan kɛmɛ mó vialu Arpaksad. Vɔsila tiɔn o kpundɛ mɛmma bɛndoo kɔɔli kon yɔŋnun ni.

¹¹Mɛɛ o velu Arpaksad, mó cii vɛlɛ vɔsilan kɛmɛ leŋuɛɛnu, mó vialu cuavaa celen: a piaandua a à laandua.

¹²Mɛɛ Arpaksad cii vɔsilan beleyaa a laŋuɛɛnu, mó vialu Sela.

¹³Mɛɛ o velu Sela, mó cii vɛlɛ vɔsilan kɛmɛ lehiɔɔlu a layàá, mó vialu cuavaa celen: a piaandua a à laandua.

¹⁴Mɛɛ Sela cii vɔsilan beleyaa, mó vialu Hebɛr.

¹⁵Mɛɛ o velu Hebɛr, mó tosa vɛlɛ vɔsilan kɛmɛ lehiɔɔlu a layàá, mó vialu cuavaa celen: a piaandua a à laandua.

¹⁶Mɛɛ Hebɛr cii vɔsilan beleyaa a lahiɔɔlu, mó vialu Pelɛk.

¹⁷Mɛɛ o velu Pelɛk, mó tosa vɛlɛ vɔsilan kɛmɛ lehiɔɔlu a beleyaa, mó vialu cuavaa celen: a piaandua a à laandua.

¹⁸Mɛɛ Pelɛk cii vɔsilan beleyaa, mó vialu Reu.

¹⁹Mɛɛ o velu Reu, mó tosa vɛlɛ vɔsilan kɛmɛ lediin a laŋɔmahiɔɔlu, mó vialu cuavaa celen: a piaandua a à laandua.

²⁰Mɛɛ Reu cii vɔsilan beleyaa a latiɔn, mó vialu Seruk.

²¹O violɔn Seruk-o kɔɔli, mó tosa vɛlɛ vɔsilan kɛmɛ lediin a laŋɔmmɛw, mó vialu cuavaa celen: a piaandua a à laandua.

²²Mɛɛ Seruk cii vɔsilan beleyaa, mó vialu Nahɔr.

²³O violɔn Nahɔr-o kɔɔli, mó tosa vɛlɛ vɔsilan kɛmɛ lediin, mó vialu cuavaa celen: a piaandua a à laandua.

²⁴Mɛɛ Nahɔr cii vɔsilan bidiin a laŋɔmahiɔɔlu, mó vialu Tera.

²⁵Mɛɛ o velu Tera, mó tosa vɛlɛ vɔsilan kɛmɛ a tɔ́ a laŋɔmahiɔɔlu, mó vialu cuavaa celen: a piaandua a à laandua.

²⁶Mɛɛ Tera cii vɔsilan belaŋɔmmɛw, mó vialu poaa nda yáá: Abram, Nahɔr a Haran.

²⁷Diola vanaa fula o polale Tera len nin-nda la co lan ni, Tera yɔŋnun kon fuɲaa Abram, Nahɔr a Haran-ndo pɛɛn: mí Haran vialu Lɔt.

²⁸Haran kon mɛi Tera fuɲa ndɔ yoomu, mó vu nɛɛ ndóò velun Ur o lɛŋnde Babilonii len nin-nda.

²⁹Mí Abram yil lanɔɔ, diolan Sarai. Mí Nahɔr bɛɛ yil lanɔɔ, diolan Milka, cua Haran-ndo o va ni. Haran kon koni velu vɛlɛ Yiska ni.

³⁰Sarai ndóò vilu hɔ́ɔ́ le, kani o ve vana vialaa le.

³¹Mí Tera cua Abram po ndɔ, a Lɔt po ndɔ mama, po Haran-ndo pɛɛn, mó cua vɛlɛ Sarai lanɔɔ Abram po ndɔ, mó faŋan Ur o lɛŋnde Babilonii len nin, mó kɔa a nda o lɛŋnde Kanaan-nden nin. Mɛɛ nda tiiya Haran ciee, má cal lon.

³²Tera ciiyo vɔsilan kɛmɛ lediin a laŋuɛɛnu, mó vu Haran ciee lon.