Read Kissi O Kandɔɔ 12 Bible Online

O Kandɔɔ 12 - Kissi bible

O Kandɔɔ 12

¹Mí Mɛlɛka dimul Abram aa: «Faŋan o lɛŋnde nɔmnde n velun nin-nden nin, faŋan vanayan nɔmndon a yungu fuɲa nɔm-ndo ikɛi, ma kɔɛ o lɛŋnde ya co nɔm cɔm-nden nin.

²I siinguunin nɔm fuɲa-mama vanaa-mangalaa-isɔɔa súúlan taw. I dɔawnin nɔm duaa ma pɛlnun ladio. Vanaa bɔɔ-bɔɔ a sɔlanin duaa nɔm o ba bɛngu.

³Vanaa dɔawnin nɔm duaa-a, i dɔawnin nda duaa. Kɛ vanaa dɔawnin nɔm danga-a, i dɔawnin nda danga. O nɔm kɔɔli vanndacieea o ceendo coo kpow a sɔlanin duaa ni.»

⁴Abram ndóò nɔ vɔsilan belaŋɔmmɛw a laŋuɛɛnu, mó cɛl le faŋanndo Haran mɛɛ Mɛlɛka ndóò dimul ndu yɛ.

⁵Mó cua Sarai laa ndɔ a Lɔt po pɔmbɔ ndɔ-o, má kɔa a ɲɛ-ɲɛ sɔlaa va nda o ba, má kɔa vɛlɛ a cɛa ndáà pendu Haran-nda. Mɛɛ nda tiiya o lɛŋnde Kanaan-nden nin,

⁶mí Abram kei o lɛŋnden tɛɛn, mó kɔa háá o fonda nɔ diolan aa Sikɛm-ndo, má tiiya nɛɛ yálán Mamre-o va-a. Telen kon, Kanannda va icali o lɛŋnde len nin.

⁷Mí Mɛlɛka cɔmnun Abram, mó dimul ndu aa: «I yɔngunin cuavaa nɔmaa imamaa lɛŋnden nden.» Mí Abram cɔaw fonda-loamaa-lasálàá o fonda Mɛlɛka cɔmnun ndu kon-ndo le ndu Mɛlɛka sálàá solullo lecoo.

⁸Mó faŋan o fonda kon, mó kɔa o lɛŋnde n'pembulen nin, Betɛl a ba paalen le can-ndo, mó kila dɔ́ɔ́ngɔ́ ndɔɔ Betɛl a Ai tɛɛn. Betɛl va a kpengii paalen le del-le, Ai va a kpengii le can-nde. Lon bɛɛ, mó cɔaw fonda-loamaa-lasálàá le Mɛlɛka, mó piɛi Mɛlɛka lon.

⁹O kon kɔɔli, mó can muungoo a ba too. O lo kɔlan o pɔm-pɔmbɔ, mó kɔ tiiya o lɛŋnde veselɛilen Nekɛv nin.

¹⁰Mí yima fofolan ma luɛi o lɛŋnde Kanaan-nden nin, o kon, mí Abram kɔa o lɛŋnde Esipte len nin le telen bingi tosaa lon. Kani fofola kon va bɔɔ o lɛŋnde Abram va icali nin-nden nin.

¹¹Tuma nda va le tiiyaa Esipte-o, mó dimul Sarai laa ndɔ aa: «I sina maa a naŋ hɔlla taw.

¹²Te Esiptea ce nɔm dɔ́ɔ́ pɛ, a co dimi aa laa nuu n co ni. O kon, a diinin ya mà mɛi nɔm yoomu.

¹³Lelan, a ɲuna nɔm pɛ, a dimul nda aa yema nuu n co ni, le mɛɛ nda ca ya ɲia mì lo yoomu le nɔm yɛ.»

¹⁴Nduyɛ lekɛ́ndɛi, mɛɛ Abram tiiya Esipte, mí vanaa kan ca maa laa ndɔ naŋ taw.

¹⁵Mí vanaa va baalaa o Faraɔnnɔɔ lo bɛ́ɛ̀-a kɔ kpingal masaa naŋɔɔ cuaa ho. Le hee, má cua ndu, má yàà ndu o cɛi lemasa Faraɔnnɔɔ nin.

¹⁶Le Sarai kon, mí Faraɔnnɔɔ tosal Abram dɛnɛ kɛndɔɔ taw. Mó fanda ndu saa, cuinnda, nawva, sofɛlɛa laandua a à piaandua, buɛyaa laandua a ɲɔɔmɛɛa.

¹⁷Kɛ mí Mɛlɛka tuisi masa kon nda vanaa ndɔa dɛnnda palaala bɛndulan coo le Sarai kon, lanɔɔ Abram pɛɛn.

¹⁸O kon mí Faraɔnnɔɔ viam kilaa, ma kɔ veelu Abram. Mó ɲuna ndu aa: «Dɛnɛ kɔlvesɛi yɛɛ n tosal-lɛ ya hoo? Le yɛɛ n kɛɛ yɛ ya dimul maa laa nɔm cuaa ho co ni?

¹⁹Le yɛɛ n dimi yɛ maa yema nɔm o co ni, mí ya i siinguu ndu laa ni? Má cè laa nɔm! Cua ndu mà faŋan o lɛŋnde nilen nin few-few.»

²⁰Mí Faraɔnnɔɔ soli vannda le Abram nda laa ndɔ a ɲɛ-ɲɛ va ndu o ba solio o lɛŋnde ndɔlen nin.