Read Kissi O Kandɔɔ 16 Bible Online

O Kandɔɔ 16 - Kissi bible

O Kandɔɔ 16

¹Sarai, lanɔɔ Abram ndóò vilul Abram hɔ́ɔ́ le. Kɛ ndu Sarai ndóò nɔ cɛ laandoo pum o ba diolan Akar, Esiptenɔɔ o va ni.

²Mó dimul Abram pɔnɔ ndɔ aa: «Fallo, nɔm pila ce maa Mɛlɛka siinguu ya vana vilu loo. Lelan, lueinun cɛ ni laandoo ho coo, bɔɔle mì ndu vilul-la hɔ́ɔ̀.» Mí Abram cɛl sɔɛi laa ndɔ dimul ndu ken-nde.

³O kon, mí Sarai cua Akar cɛ ndɔ laandoo, mó hivi Abram pɔnɔ ndɔ kɔɔli. Abram ndóò cii nin vɔsilan tɔ́ o lɛŋnde Kanaan-nden nin ndon.

⁴Mí Abram bɔŋa nda Akar, mí Akar cua folio. Mɛɛ o ce maa o co hunɔɔ violɔɔ, mó kandu Sarai vana ndɔ bɛndu tɛɛndanndo.

⁵Mí Sarai dimul Abram aa: «Nɔm tosa ni mí cuaambɔɔ ho tɛɛndan ya. Ya hivi nɔm cɛ nuu kɔɔli ni, kɛ kabi o cennun nin maa a folio o co ni, o co pɛngi ya tɛɛndanndo le. Màá Mɛlɛka kiolu yamɛi naa tɛɛn naa nɔm!»

⁶Mí Abram mulul ndu aa: «Sumialii nɔm cɛ nɔmndo co ni, mɛɛ n tuu pɛ le biyɔɔ a ndu a bii a ndu lende.» O kon, mí Sarai kandu Akar saangiaa, o lo ndu mɔnɛi lueiyo lende háá mí Akar sɔndan.

⁷Mí mɛlɛkanɔ Hala-o komal ndu o soon kólaa ikɛi o lɛŋnde veselɛilen nin, o nɛi Sur-o coo.

⁸Mó ɲuna ndu aa: «Akar, cɛ Sarai-yo, kuɛɛ n cɛn yɛ? Kuɛɛ n co yɛ kɔlan?» Mó muli aa: «Sarai vana ni bɛndu ya co ɲaanɔnndo ni.»

⁹Mí mɛlɛkanɔ Hala-o dimul ndu aa: «Muungu vana nɔm bɛndoo o ibuŋ, mà kɔ tuisin ndu o labɛngunin.»

¹⁰Mó dimul ndu vɛlɛ aa: «I co nɔm cuavaa-imamaa yɔngu, a vanin sɛ́lɛ́ bɛndoo taw, vana nɔlanin nda cɔmndo le.

¹¹Foli n nɔ hoo-o, vanapɔnɔɔ n co violɔɔ ni, mà ke ndu diolan aa Ismaɛl (kon co dimio ni aa ‹Hala tuɛi›), kani Mɛlɛka tuei nɔm kuŋndan o sanga nɔmndo nin.

¹²Po n co violɔɔ-o vanin maa sofɛlɛ yondo, o simulnin vannda kpow, mì vannda kpow a simul ndu. Kɛ ndu vanin ndu pilɛ teengen puapilɛa ndɔa kpow o hɔl.»

¹³Mí Akar pila ɲunan aa: «Mò va maa cɔu ya ce Hala co ya hoo cɔu nanu-o ni?» Mó ke Mɛlɛka diolan aa Ata-Ɛl-Royii (kon co dimio ni aa «Nɔm co Hala co ya cɔu-vo ni»).

¹⁴Lelan nda ke soon kólaa kon diolan ni aa: soon kólaa Vana yoomaa co ya cɔu-vo. Kadɛs a Berɛd tɛɛn soon kon co ni.

¹⁵Mí Akar vilul Abram hɔ́ɔ́ piaandoo, mí Abram ke ndu diolan aa Ismaɛl.

¹⁶Tuma Akar vilul kon Abram hɔ́ɔ́-o, Abram ndóò nɔ vɔsilan belaŋɔmaa a laŋɔmpum.