Read Kissi O Kandɔɔ 18 Bible Online

O Kandɔɔ 18 - Kissi bible

O Kandɔɔ 18

¹Mí Mɛlɛka cɔmnun Abraham nɛɛ o va icali o yálán Mamre-o ikɛi-ya, Abraham va icali o cɛi-kola-toandaa ndɔɔ dio a telen hangul bɛndu-bɛndoo va ipala nuaa-o.

²Mɛɛ o tofa, mó ca langbaa nda yáá isisi tiŋ lándán. Mó can ɲaali o cɛi-kola-toandaa ndɔɔ dio, mó kɔa nda demullo a kiltan. Mɛɛ o tiiya, mó baŋ vulan,

³mó dimul nda aa: «Vanaa nia bɛndua, a yandi, la kei ya vana baala niaa ikɛi mì la hiownun lende le.

⁴La cum ndɔ mì kɔ kondu niaa mɛnndan ɲɛ-pɔmbɔ le pelon pulɔɔ. La cii pɛ pelon pulɔɔ, la cal, la pɛngi o yɔmndo ho bɛngu.

⁵La mɛi-yɔ, i cuu vɔ niaa ɲɛdiaa ɲɛ-pɔmbɔ, haliko mi la sɔla yoomuan malan niaa hiaw nɛɛ niaa co kɔlan-nda. Kani o dɔ́ɔ́ngɔ́ vana niaa baalaa ikɛi niaa kei nuaa ni.» Má mulul ndu aa: «Bala tiɔn. Tosa mɛɛ n dimi yɛ.»

⁶O kon, mí Abraham luɛi cɔ́-cɔ́ o cɛi-kola-toandaa ndɔɔ nin, mó dimul Sara laa ndɔ aa: «Kɔndu kpeyan hiow naŋɔɔ-o kiloo bidiin a leŋuɛɛnu, ma linda ndu cɔ́-cɔ́, ma toŋ dɛɔ.»

⁷Mó kɔa vɛlɛ a kiltan nɛɛ cɔlua ndɔa va-a, mó kɔ bii naw téndé kɛndɛ-kɛndɔɔ, o dialun ndɔn peelu ɲɛkɛndɛi-yo, mó yoo buɛi ndɔɔ pum, mí buɛi kon yaw ndu a kiltan.

⁸Mɛɛ vision lɔw, mó cua cuɛima nɔnɔan a nɔnɔan, mó handu o vision coo, mó yoo langbaa yaa kan mun. Tuma nda va mun dioo o yɔmndo bɛngu-o, mí Abraham sim nda ikɛi.

⁹Mɛɛ nda cii dioo, má ɲuna ndu aa: «Ɔ́ɔ̀ Sara laa nɔm?» Mí Abraham muli aa: «O co o cɛi-kola-toandaa nin.»

¹⁰O kon mí o pilɔɔ dimul ndu aa: «A boondei he ɲinasiaŋ, i muungunin o nɔm ndo nanu, nduyɛ Sara laa nɔm co hɔ́ɔ́ piaandoo violɔɔ a telen kon.» Sara va nilan yaŋɔɔ o cɛi-kola-toandaa dio, mó tuɛi sɔɛi ken.

¹¹Abraham nda Sara laa ndɔ, ndáà yuuvan nin taw. Sara ndóò hiow nin telen vialaa lɔ́ɔ́ levil.

¹²Le hee, mí Sara mam o kɔl ndɔɔ nin, mó dimi aa: «Yee a yuuvɛi naa n yuuva nin hee naa pɔnɔ nuu kudɛɛ-kudɛɛ-e naa n can vɛlɛ fafala kon ni?»

¹³O kon, mí Mɛlɛka ɲuna Abraham aa: «Le yɛɛ nɛ Sara mam yɛ, mó dimi aa: ‹Mɛɛ ya yuuva nin nuaa yɛ, i nɔla lɛ pá mì velu hɔ́ɔ́?›

¹⁴Yɛɛ nɛ kendu yɛ a Mɛlɛka? Tuma ya keinin o nɔm ndo ɲinasiaŋ-nde, Sara vialunin hɔ́ɔ́ piaandoo.»

¹⁵Mí siòònde bii Sara, mó vuunun aa: «I mem te.» Kɛ mí Mɛlɛka dimul ndu aa: «Vuunun te, a mam.»

¹⁶O kon kɔɔli, mí langbaa yaa kan hiawnun, má kɔa a ba Sodɔm-ndo. Mí Abraham liila nda ɲɛ-pɔmbɔ, mó mal nda n'pelu.

¹⁷Mí Mɛlɛka pila ɲunan aa: «Bàà mì vin Abraham ɲɛ ya co hunɔɔ tosa-o?

¹⁸O siŋnunnin fuɲa-mamaa le vanaa-mangalaa-isɔɔa sɛ́lɛ́ bɛndoo, a nɔnin kpaayaa taw-va. Vanaa-mangalaa-isɔɔa o lɛŋnden coo kpow sɔlanin duaa ndu o ba bɛngu.

¹⁹Kani i hɛli ndu le cuavaa ndɔa imamaa a vanaa co o ba ndɔɔ bɛngu-a vomɔɔ mà kela o nɛi Mɛlɛka-o coo, mà tosa dɛnɛ sandaa, mà kelu yamɛi o sandei nin, haliko mi peelu kpema ya yiilu ndu Abraham-ndo.»

²⁰O kon, mí Mɛlɛka dimul Abraham aa: «Caŋnda vannda co a kɔlvesɛi yungoo Sodɔm a yungoo Komɔr o sondo lan la co labɔɔ. A hiw bɔɔ laasianndo a yɔŋ vɔɔndo.

²¹Lelan, i yeema mì tol lon, mì tofa te toɲaa sɔɔn ya co tueyɔɔ a nda o kɔɔ-on co ni. Te o co yɛ dɔ́ɔ́ toɲa le, i co vɛlɛ sina.»

²²Mí langbaa kan mulin, má kɔa a ba Sodɔm-ndo. Mí Abraham ndu lo vɔ isisi Mɛlɛka o hɔl tuŋ.

²³Mó sɔɔnguu Mɛlɛka ikɛi, mó dimul ndu aa: «Bàà mà muulian vana sandaa nda vana yɔŋ vɔɔndo tɛɛmbuu latulu?

²⁴Bɔɔle vanaa sandaa co beleŋuɛɛnu o kobio ho nin, bàà mà tɛɛmbuu nda? A nɔla mà mal vannda o kobio ho nin haki le vanaa sandaa beleŋuɛɛnua co haa nda tɛɛn-nda le?

²⁵A bɛnda ma tosa kon te. A bɛnda ma tosa a vana sandaa mɛɛ n tosa a vana vɔɔndo yɛ le. A bɛnda ma dii vana sandaa nda vana kɔlvesɛiyo latulu le. Nɔm vana co yamɛi ceendo kiolɔɔ-o, tosa mɛɛ dɛnɛ sandaa co yɛ.»

²⁶Mí Mɛlɛka mulul ndu aa: «Hali vanaa sandaa beleŋuɛɛnu ya saalun Sodɔm ni, i mal vanaa tɔ̀a kpow haki le nda.»

²⁷Mí Abraham dimi aa: «Ya co hoo maa cundu a lapul-lo, i suukan a Maalii nuu.

²⁸Bɔɔle mì vanaa ŋuɛɛnu faŋan o vanaa sandaa beleŋuɛɛnua ha coo. Le vanaa ŋuɛɛnua faŋan kan-nda, mà tɛɛmbuu kobio ho?» Mí Mɛlɛka mulul ndu aa: «Ɛ-ɛ, te i saalun pɛ vanaa sandaa belehiɔɔlu a à ŋuɛɛnu, i tɛɛmbuunin ndu le.»

²⁹Mí Abraham dimi vɛlɛ aa: «Bɔɔle mà saalun vanaa sandaa belehiɔɔlu kínɛí.» Mí Mɛlɛka mulul ndu aa: «I saalun pɛ vanaa sandaa belehiɔɔlu, i tɛɛmbuunin kobio le.»

³⁰Mí Abraham dimi aa: «Maalii, tambu kɔl le ɲuna ya co hunɔɔ cɔɔlu-o le. Bɔɔle mì vanaa sandaa va n'van beleyaa kínɛí. A nda kpow, mà tɛɛmbuu kobio?» Mí Mɛlɛka dimul ndu aa: «Te i saalun pɛ vanaa sandaa beleyaa, i tɛɛmbuunin kobio le.»

³¹Mí Abraham dimi vɛlɛ aa: «I co vɔ suukanndo a Maalii nuu tuŋ. Bɔɔle vanaa sandaa bidiin koni co lon ni.» Mí Mɛlɛka mulul ndu aa: «Te i saalun pɛ vanaa sandaa bidiin, i tɛɛmbuunin kobio le.»

³²Mí Abraham dimi vɛlɛ aa: «A yandi, tuulu kɔl te Maalii. Mɛi-yɔ mì ɲuna nihau ɲuna mɛɛlaa. Bɔɔle vanaa sandaa tɔ́ kínɛí co lon ni.» Mí Mɛlɛka mulul ndu aa: «Te i saalun pɛ vanaa sandaa tɔ́ lon, i tɛɛmbuunin Sodɔm te.»

³³Mɛɛ nda cii suukanndo nda Abraham, mí Mɛlɛka kɔannun, mí Abraham ndu muungu o ndu lo.